Ulttyq bank Tóraǵasynyń orynbasary Áliia Moldabekova munai baǵasynyń tómendeýine negiz bolǵan sebepter men munai qunynyń dinamikasy týraly aitty, dep habarlaidy QazAqparat.
«Naýryzda munai baǵasynyń qubylmalylyǵy aitarlyqtai kúsheidi. Eger aldyńǵy tórt ai ishinde Brent baǵasy ósip, ótken jyldyń qazanynan bastap jalpy alǵanda 77% qosylsa, naýryzda túzelip, baǵalar bir barrel úshin 63,54 AQSh dollaryna deiin 3,9%-ǵa tómendedi», - deidi Ulttyq Bank Tóraǵasynyń orynbasary Áliia Moldabekova.
Onyń aitýynsha, naýryzdyń basynda Saýd Arabiiasy tarapynan óndirýdi erikti túrde kúnine 1 mln barrelge qysqartýdy bir mezgilde uzarta otyryp, sáýirde óndirý kóleminiń deńgeiin saqtaý jónindegi OPEK+ sheshimine bailanysty oń sentiment jalǵasty.
«Sonymen qatar, AQSh ekonomikasyn qoldaý sharalarynyń toptamasyn maquldaý, benzin qorynyń tómendeýinen kórinetin AQSh-taǵy munai ónimderine suranystyń ósý belgileri naýryzdyń ortasyna deiin munai baǵasyn eń joǵary deńgeide ustap turdy. AQSh-taǵy munai qorynyń ósýi týraly jańalyqtar vaktsina egý baǵdarlamalarynyń baiaýlaýymen jáne Eýropada qosymsha karantindik shekteýlerdiń engizilýimen birge aidyń ekinshi jartysynda munai baǵasynyń naýryz boiy ósýin tómendetýge májbúrledi», - deidi ol.
Máselen, keibir Eýropa elderi yqtimal janama áserlerge qatysty qaýiptenýge bailanysty AstraZeneca vaktsinasyn qoldanýdy toqtatty, al Germaniia 18 sáýirge deiin shekteý sharalaryn uzartatyny týraly habarlady.
«Álemdik óńdelmegen munai saýdasynyń onnan bir bóligi ótetin Sýets kanalynyń buǵattalýy munai jetkizýdiń toqtap qalýyna ákelip, baǵa belgileýge ýaqytsha qoldaý kórsetti. Alaida, oqiǵa qysqa merzimdi sipatta bolyp, jalpy teris serpindi ózgertpedi. Qazirgi jaǵdai ekiushty bolyp qalýda», - deidi Áliia Moldabekova.
