«Eńbek resýrstaryn damytý ortalyǵy» AQ (budan ári - ERDO) derekteri boiynsha 2021 jylǵy naýryzda Elektrondyq eńbek birjasynda (budan ári - EEB) 62,5 myń bos jumys orny ornalastyryldy, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetne silteme jasap.
Atap aitqanda, onyń ishinde 49,8 myńy – bilikti qyzmetkerler úshin. Izdenýshiler 51,1 myń túiindeme jariialady, onyń 34,3 myńy bilikti mamandardan.
Ótken aimen salystyrǵanda EEB - daǵy bos jumys oryndarynyń jalpy sany 5% - ǵa, al ornalastyrylǵan túiindemelerdiń sany 17% - ǵa azaidy. Qazirgi ýaqytta EEB-da 32,2 myń bos jumys orny ashyq kúiinde qalyp otyr.
«1 naýryzdan bastap portal keńeitilgen fýnktsionalmen jumys isteidi. Iaǵni jumys berýshini nemese jumyskerdi izdeý kriteriileriniń sany ulǵaidy, kásipterdiń jańartylǵan anyqtamalyǵy men daǵdylar banki engizildi, sondai-aq «Eńbek» memlekettik baǵdarlamasy sheńberinde paidalanýshylarǵa erikti túrde qonys aýdarý jóninde aqparat beretin servis alǵash ret iske qosyldy. Paidalanýshylardyń jańartylǵan qyzmetke degen qyzyǵýshylyǵynyń artýyn kútemiz, ol jumys berýshilerge tiisti qyzmetkerlerdi tańdaýǵa, al azamattarǵa laiyqty jumys tabýǵa kómektesedi», – dep atap ótti ERDO Strategiia jáne jobalyq basqarý departamentiniń bas sarapshysy Aijan Muqyshbaeva.
Jekelegen bilikti mamandyqtardy qarastyra otyryp, naýryz aiynda EEB-da avtobýs júrgizýshileriniń (950 bos orynǵa qarsy 217 túiindeme), kúzetshilerdiń (385 túiindeme jáne 941 bos oryn), orta meditsinalyq personaldyń (772 túiindeme jáne 1559 bos oryn), daiashylardyń (18 túiindeme jáne 506 bos oryn) jáne jalpy praktika dárigerleriniń (186 túiindeme jáne 669 bos oryn) tapshylyǵy baiqalǵanyn atap ótken jón. Biliktiligi joq qyzmetkerlerdiń arasynda júk tiegishter, tazalaýshylar, sondai-aq as úi boiynsha kómekshiler jetispeidi.
«Pandemiia kezinde densaýlyq saqtaý salasyndaǵy joǵary bilikti mamandarǵa da suranys joǵary. Naýryzda 3,2 myń bos jumys orny ornalastyryldy, olar boiynsha negizinen jalpy praktika dárigerleri, pediatr dárigerler, anesteziolog dárigerler jáne reanimatologtar qajet boldy. Sonymen qatar, bar usynys jumys berýshilerdiń qajettilikterin qanaǵattandyrmaidy. Naýryzda osyndai 788 túiindeme ǵana ornalastyrylǵan», – dep qorytyndylady Aijan Muqyshbaeva.
Aita ketý kerek, bilikti emes eńbek usynysy, sondai-aq mamandyqtar boiynsha bilikti jáne bilikti emes eńbek resýrstaryna suranys ótken aimen salystyrǵanda ózgerissiz qaldy, al bilikti eńbek usynysy aitarlyqtai ózgeristerge ushyrady. Aqpan aiynda kóbinese keńse qyzmetkerleri, qarjy jáne investitsiialar boiynsha keńesshiler, zańgerler men ekologtar kóp bolǵan bolsa, naýryz aiynda aýyl sharýashylyǵy qyzmetkerleri, konditerler men tiginshiler arasynda joǵary básekelestik baiqalady. Biliktiligi joq jumyskerlerge keletin bolsaq, naýryz aiynda aýmaqty kógaldandyrý jáne abattandyrý boiynsha jumysshylar, aýla sypyrýshylar, sondai-aq vahterler men konserjder artyq boldy.
Óńirlik bóliniste jumys berýshilerden usynǵan bos jumys oryndarynyń eń kóp sany Nur-Sultan qalasynda (jalpy sanynan 9,4 myń nemese 15%), Qostanai oblysynda (7,4 myń nemese 12%), sondai-aq Almaty qalasynda (5,6 myń nemese 9%) baiqaldy. Bul rette bir ai ishinde bos oryndar sanynyń eń kóp ósýi Nur-Sultan qalasynda (+23%), Soltústik Qazaqstan (+22%) jáne Pavlodar (+22%) oblystarynda oryn aldy. Sonymen qatar, bos oryndardyń eń azy Qyzylorda (jalpy sanynan 1,3 myń nemese 2%) jáne Jambyl (1,9 myń nemese 3%) oblystarynyń, sondai-aq Shymkent qalasyna (1,9 myń nemese 3%) tiesili bolyp otyr. Bir aida bos oryndar sanynyń qysqarýy Túrkistan (-45%) jáne Jambyl (- 32%) oblystarynda baiqaldy.
«Naýryz aiynda bilikti eńbekke degen qajettilik Pavlodar jáne Soltústik Qazaqstan oblystarynda 24%-ǵa jáne 19% - ǵa ósti. Eki aimaqta da fermerler men aýyl sharýashylyǵy salasyndaǵy jumysshylar, sondai-aq qyzmet kórsetý jáne satý salasyndaǵy jumysshylar suranysqa ie boldy. Soltústik óńirlerde kóktemgi egis jumystarynyń bastalýy aiasynda aýyl sharýashylyǵy qyzmetkerlerine suranystyń artýyn kútýdemiz, al qyzmet kórsetý jáne satý salasyndaǵy qyzmetkerlerge qajettiliktiń artýy naýryz aiynyń basynan bastap osy óńirlerde karantindik sharalardyń álsireýimen bailanysty», – dedi Aijan Muqyshbaeva.
Izdenýshilerge keletin bolsaq, túiindemelerdiń eń kóp sany Jambyl (jalpy sanynan 6 myń nemese 12%), Almaty jáne Túrkistan oblystarynda (4,1 myń nemese 8%) ornalastyryldy. Bul rette naýryz aiynda Aqmola jáne Soltústik Qazaqstan oblystarynda turatyn azamattar az jumys izdegen (1,5 myń nemese 3%-dan).
