Qazaqstan musylmandary dini basqarmasy tóraǵasynyń birinshi orynbasary, naib múfti Naýryzbai Ótpenov qajylyqqa jaǵdaiy bar musylmandar bara alatynyn aitty, dep habarlaidy Sputnik Qazaqstan.
Aqparat jáne qoǵamdyq damý ministrligi din isteri komitetiniń tóraǵasy Erjan Nókejanov biyl qajylyqqa 3200 qazaqstandyq baratynyn habarlady.
"Biyl qajylyq maýsymy 30 shildeden bastalady. 30 shilde kúni qajylyqqa niet tanytqan azamattar Shymkent pen Aqtaý qalalarynan Saýd Arabiiasyna attanady. Qajylyqqa Saýd Arabiiasy koroldigi tarapynan bizge 3200 azamatqa kvota berildi. Qazaqstandyqtardy FlyNas jáne Scat áýekompaniiasy tasymaldaidy", - dedi ol ortalyq kommýnikatsiialar qyzmetinde ótken brifingte.
Sondai-aq, ol qajylyqqa baratyn adamdarǵa túsindirme jumystary júrgizilip jatqanyn atap ótti. Qazaqstan musylmandary dini basqarmasy tóraǵasynyń birinshi orynbasary, naib múfti Naýryzbai Ótpenov arnaiy missiia qurylǵanyn aitty.
"Qajylyqqa baratyn 3200 adam úshin Qazaqstan musylmandary dini basqarmasy tarapynan arnaiy missiia quryldy. Onda bizdiń basqarmanyń basshylyq quramy, bilikti imamdar, dárigerler, BAQ ókilderi bar. 500-ge jýyq meshitte qajylyqqa baratyndarǵa arnaiy seminarlar uiymdastyrylyp, túsindirme jumystary júrgizildi", - deidi naib múfti.
Onyń aitýynsha, qajylyq missiiasynyń tóraǵasy bas múftidiń orynbasary Alaý Ádilbaev.
Sondai-aq, Naýryzbai Ótpenov qajylyqqa kimder bara alatynyn, ári ol úshin qaryz alýdyń qajeti joq ekenin jetkizdi. Sebebi, shariǵatta oǵan ruqsat etilmegen.
"Kez kelgen musylman qajylyqqa barǵysy keledi. Ony armandaidy. Qajylyq kimge paryz ekenin aldyn ala bilip alǵanymyz jón. Alla Taǵala qasietti Quranda "kimniń jaǵdaiy kelse, sol adam ómirinde bir ret qajylyq jasasyn" degen. Iaǵni jaǵdaiy bar musylman ómirinde bir ret qajylyqqa barýy paryz. Árine, odan keiin de barýǵa bolady. Keibir kezderi adamdar qajylyqqa barý úshin bir-birinen qaryz nemese kómek suraidy. Shariǵat muny qoldamaidy. Qajylyq – qulshylyq. Ol demalatyn oryn emes. Sondai-aq, qajylyqqa barý - bul bir dárejege kóteriletin mansap emes. Muny bilgen jón", - dedi ol.
Sóz sońynda naib múfti qajylyqqa kóbinese Túrkistan oblysynyń turǵyndary baratynyn aitty. Qajylyqqa, negizinen 30-50 jas aralyǵyndaǵy qazaqstandyqtar attanady eken.
