Sanitarlyq-epidemiologiialyq baqylaý komiteti qazaqstandyqtardy Naýryz meiramyn úide toilaýǵa úndedi, dep habarlaidy "Ult aqparat".
«Biz, sanitarlyq-epidemiologiialyq baqylaý qyzmetiniń mamandary retinde aldaǵy merekelik demalys kúnderin otbasylyq ortada ǵana ótkizýge keńes beremiz. Barys-kelisti azaityp, buqaralyq sharalarǵa barmaýǵa jáne uiymdastyrmaýǵa, adamdar kóp jinalǵan oryndarǵa bas suqpaýǵa keńes beremiz», - delingen habarlamada.
Komitet ókilderi Ulys kúnine arnalǵan kontsertter men qoiylymdardy, kórmeler men aitys saiystaryn onlain formatta ótkizgen durys dep otyr.
«Qazaqstannyń memlekettik bas sanitar dárigeriniń Qaýlysy boiynsha ókizýge ruqsat etilgen sharalar barlyq sanitarlyq-epidemiologiialyq talaptardy saqtai otyryp, adamdardyń shoǵyrlanýyna jol bermeitindei etip uiymdastyrylýy kerek», - deidi mamandar.
Komitet mamandary sharalardy ótkizý múmkindigi jergilikti óńirdiń qai aimaqqa jatqyzylǵanyna bailanysty ekenin eske salady. Iaǵni, «qyzyl aimaqtaǵy» óńirlerde kez kelgen shara ótkizýge tyiym salynǵan. «Sary aimaqtarda» shara ótetin oryn 20%, «jasyl aimaqtarda» 30% ǵana tolýy kerek.
«Kúres, aýdaryspaq siiaqty adamdardy bir-birimen janastyratyn sporttyq sharalar ótkizýge bolmaitynyn eske salamyz. Ýlanýdyń aldyn alý úshin qoǵamdyq shara ótken jerde as ázirlep, ishýge de tyiym salynǵan. Qurmetti qazaqstandyqtar! Osy bir shýaqty merekeni et jaqyndaryńyzben birge úide ótkizip, ózderińizdi saqtańyzdar» - deidi sanitarlyq-epidemiologiialyq baqylaý qyzmeti.
