Qyzylorda oblysynda hirýrgiialyq ota kezinde naýqastyń denesinde dáke tampony qalyp qoiǵan. Sot meditsinalyq mekemeni naýqasqa 1,5 mln teńgeden astam ótemaqy tóleýge mindettedi, dep habarlaidy ult.kz.
Sot materialdaryna sáikes, áielge kistany alyp tastaý boiynsha ota jasalǵan. Alaida eki aidan keiin naýqas basqa meditsinalyq mekemege qaita júginip, sol jerde ekinshi ret ota jasalǵan. Operatsiia barysynda alǵashqy hirýrgiialyq aralasý kezinde qalyp qoiǵan dáke tampony anyqtalyp, alynǵan.
Meditsinalyq qatelikten keiin naýqas uzaq ýaqyt boiy aýyrsynýdan zardap shegip, jarasy qabynyp, kúndelikti tańý protsedýralarynan ótýge májbúr bolǵan. Sondai-aq qaita otaǵa óz qarajatyn jumsaǵan.
Bógde zattyń naýqastyń denesinde qalǵany ota hattamasy, meditsinalyq qujattar, beinejazba jáne qaita emdeý júrgizilgen meditsinalyq mekeme ókiliniń túsiniktemesi arqyly rastalǵan.
Sonymen qatar jospardan tys tekserý kezinde ýákiletti organ meditsinalyq kómek kórsetý barysynda birqatar zańbuzýshylyqty anyqtaǵan. Atap aitqanda, operatsiia kezinde mindetti standarttar saqtalmaǵan, otadan keiingi baqylaý tiisti deńgeide júrgizilmegen jáne meditsinalyq qujattar talapqa sai toltyrylmaǵan.
Sot usynylǵan dálelderdi zerdelei kele, meditsinalyq mekemeniń kinási dáleldendi degen qorytyndyǵa kelgen.
Nátijesinde talap aryz qanaǵattandyrylyp, meditsinalyq mekemeden naýqastyń paidasyna materialdyq shyǵyn men moraldyq ziiandy óteý úshin 1,5 mln teńgeden astam qarajat óndirildi.
