Almatyda apelliatsiialyq sot plastikalyq hirýrg Dmitrii Pisarevke shyǵarylǵan sot úkimin ózgerissiz qaldyrdy, dep habarlaidy QazAqparat tilshisi.
Hirýrgtyń ota ústelinde byltyr eki áiel kóz jumǵan bolatyn. Dáriger 3 mln teńge bolatyn moraldyq shyǵyn kólemin 500 myńǵa deiin tómendetý týraly apelliatsiialyq shaǵym túsirgen edi. Ol aqshasynyń joqtyǵyna bailanysty bul qarajatty jinap bere almaitynyn aitty.
Sonymen qatar, ol sot úkimin qaita qarap, ózin aqtaýdy surady.
«Osy iske qatysym bar ekenin seziný maǵan óte qiyn. Sot úkimi shyqty. Men endi otbasymdy asyrai almaimyn. Men dárigermin, basqa eshqandai jumyspen ainalysa almaimyn. Sot sheshimin qaita qarap, meni aqtaýyńyzdy ótinem», - dedi hirýrg Dmitrii Pisarev.
Shaǵymdy qaraǵan apelliatsiialyq kollegiia Almaty aýdandyq sotynyń 29 jeltoqsandaǵy úkimin ózgerissiz qaldyrdy.
«Biz sizdiń aiybyńyz tolyq dáleldendi dep sanaimyz. Sizdi aqtap alýǵa eshqandai negiz joq», - dedi kollegiia músheleri.
Esterińizge sala keteiik, Ýkraina azamatshasy Dana Agamuradova Almatyda ish maiyn alǵyzý úshin jekemenshik emhanalardyń birinde ota jasatqan. Otadan soń 6 saǵat ótkende Dana esin jimastan kóz jumdy. Dárigerlerdiń aitýynsha, patsient mai túiirshikteriniń ókpe tamyrlaryn bitep qalýynan qaitys boldy. Oǵan otany plastikalyq hirýrg Dmitrii Pisarev jasaǵan bolatyn. Dál osy hirýrgtyń qolynan byltyr qarashada taǵy bir áiel ómirden ozdy. 30 jastaǵy Laýra Izbasarova plastikalyq ota jasatyp, omyraýyn tarttyrmaq bolǵan. Bul qylmystyq oqiǵany da politsiia tekserýge aldy.
Almaty qalalyq qoǵamdyq densaýlyq saqtaý departamenti plastikalyq hirýrg Dmitrii Pisarevtiń klinikalyq em jasaýyna sot arqyly tyiym saldy.
Kóp uzamai Almatyda taǵy bir áieldiń plastikalyq otadan qaitys bolǵany belgili boldy. 44 jastaǵy áielge otany «Moskva deLux» emhanasynyń hirýrgy Roman Alferov jasaǵan.
