Búgin Soltústik Atlantikalyq Alians Aýǵanstandaǵy beibit kelissózder týraly málimdeme jasady, dep habarlaidy QazAqparat.
- Aýǵanstan Islam Respýblikasy men «Taliban» qozǵalysynyń kelissóz toptary Aýǵanstandaǵy beibit kelissózderdiń erejeleri men rásimderi týraly jaqynda jasaǵan kelisimi jáne Ulttyq bitimgerlik jónindegi joǵary keńestiń basqarýshy komitetiniń birinshi otyrysy – Aýǵanstandaǵy turaqty beibitshilikke jetýdiń mańyzdy qadamdary. Muny aýǵan halqy naqty talap etedi. Biz (NATO- avt.) taraptardy zorlyq-zombylyqty dereý toqtatýǵa, turaqty, jan-jaqtan atysty toqtatý týraly kelissózder júrgizýge jáne kórshilerimen turaqtylyq pen beibitshilikte ómir súrip jatqan gúldengen Aýǵanstanǵa arnalǵan saiasi jol kartasy týraly kelissózder júrgizýge kelise otyryp, osy qarqyndy kúsheitýge shaqyramyz.
Qyryq jylǵa sozylǵan qaqtyǵystardan keiin kelissózderge negizdelgen saiasi retteý turaqty beibitshilikke degen jalǵyz úmit beredi. Ásirese, Taliban shabýyldarynan týyndaǵan zorlyq-zombylyq beibitshilik protsesin buzady jáne ony toqtatý kerek.
Biz kelissózder zorlyq-zombylyqty toqtatatyn, sońǵy 19 jyldaǵy progreske súienetin, barlyq aýǵandyqtardyń, ásirese áielderdiń, balalardyń adam quqyqtaryn qorǵaýdy qamtamasyz etetin, zańnyń ústemdigin qoldaityn jáne Aýǵanstanda terrorister úshin baspana bolmaýyn qamtamasyz etetin turaqty jáne jan-jaqty aýǵan beibitshilik kelisimine ákeledi dep kútemiz.
NATO jáne onyń seriktesteri Aýǵanstanǵa, aýǵan halqyna jáne aýǵan qaýipsizdik kúshterine degen adaldyǵyn rastaidy. Biz Aýǵanstan úkimeti men «Taliban» qozǵalysyn Amerika-Taliban kelisimi men birlesken amenika-aýǵan deklaratsiiasy bastamasymen bastalǵan beibitshilik protsesinde óz mindettemelerin oryndaýǵa shaqyramyz.
Alians bizdiń áskeri qatysýymyz týraly másele boiynsha konsýltatsiiany jalǵastyrady jáne eger múmkin bolsa, ony aýǵandyqtardyń ózderi jáne olardyń basshylyǵy júzege asyratyn beibit protsesti qoldaý úshin retteidi.
Biz Aýǵanstanǵa birge kirdik, birge beiimdelemiz jáne jaǵdai rettelgen kezde ǵana birge ketemiz. Biz aýǵan halqynyń beibitshilikke umtylýyn qoldaimyz.
