Respýblikalyq biýdjettiń atqarylýyn baqylaý jónindegi Esep komitetiniń tóraǵasy Natalia Godýnova «Qazaqtelekom» kompaniiasyna júrgizilgen memlekettik aýdit týraly málimet berdi, dep habarlaidy QazAqparat.
«Kvazimemlekettik sektorǵa tekserý júrgizgen kezde «Qazaqtelekomǵa» memlekettik aýdit jasaldy. Bul jerde biz eki strategiialyq problema kórip otyrmyz. Aýyldardyń kóbinde internet joq. Saldarynan respýblika aýmaǵynda balalardyń bári birdei deńgeide bilim alýyn qamtamasyz ete almaimyz.
Ekinshiden, internet joq jerdegi halyqqa oblys ortalyqtarynyń turǵyndary emin-erkin alatyn memlekettik qyzmetterdi kórsete almaimyz. Ári ketse aýdan ortalyqtarynda, kommýnikatsiialarǵa jaqyn ornalasqan kentterde ǵana ondai múmkindik bar», - dedi ol «Tsifrlyq Qazaqstan» baǵdarlamasynyń aralyq nátijesin talqylaǵan jiynda.
Sondai-aq ol bailanys operatorlarynyń paidakúnemdiginiń kesirinen astananyń ózinde internet joq jerler bar ekenin aitty.
«Tipti astananyń ózinde, Almaty aýdanynda, keibir kentterde internet joq. Operatorlar ol jerlerge internet tartýdyń tabysy az ekenin aitady. Biraq operatorlardyń budan basqa tabysy óte joǵary jobalary bar ǵoi. Tabysty sol jobalardyń esebinen toltyrýǵa bolady. Internetpen jabdyqtaý kólemi 100 paiyz bolýy kerek. Ministr durys aityp otyr. Onyń ústine «Qazaqtelekomnyń» 51 paiyzyna memleket ielik etedi.
Qazir uialy telefon arqyly memlekettik qyzmet alatyn kezge jettik. Al aýyldaǵylar áli kúnge deiin mekenjai anyqtamasyn alý úshin 100 shaqyrym jerdegi aýdan ortalyǵyna baryp júr», - dedi Natalia Godýnova.
