Búgin aqiyq aqyn Muqaǵali Maqataevtyń 90 jyldyǵyna orai Melekettik hatshy Qyrymbek Kósherbaev Hantáńiri muzbalaǵynyń týǵan jeri Qarasazda bolyp, aýyl turǵyndarymen kezdesti, sol siiaqty mýzeige aqynnyń qobyzyn tapsyrdy. Osy kúni Narynqol aýylynda 50 otbasyna jańa úidiń kilti tapsyryldy. Ortalyq alańda alyp tulǵanyń eńseli eskertkishi ashyldy. Mereitoilyq sharalarǵa Almaty oblysynyń ákimi Amandyq Batalov, Mádeniet jáne sport ministri Aqtoty Raiymqulova, QR Jazýshylar odaǵynyń tóraǵasy Ulyqbek Esdáýlet, aqynnyń uly men kelini Juldyz Maqataev pen Baqytgúl Aidarova, TÚRKSOI uiymynyń ókilderi, Parlament depýtattary, el ziialylary jáne aýdan jurtshylyǵy qatysty, - dep habarlaidy "Ult aqparat" Almaty oblysy ákiminiń baspasóz qyzmetine silteme jasap.
Mereitoilyq sharanyń mán-mańyzyna Memlekettik hatshy Qyrymbek Kósherbaev óz sózinde keńinen toqtaldy. "Muqaǵali - jyrdyń asyl qazynasy. Ol - ótken men jańanyń arasyn jalǵaǵan altyn kópir. Elbasy men Prezidenttiń bastamasymen aqynnyń ǵasyrlyq toiyn IýNESKO kóleminde ótkizýge usynystar daiyndalýda. Búgingi toi qutty bolsyn. Halqymyzdyń rýhy Muqaǵali jyrlaryndai taza, Hantáńirindei asqaq, Kólsaidai kórikti bolsyn", - degen Qyrymbek Kósherbaev Prezident Qasym-Jomart Toqaevtyń arnaiy quttyqtaýyn oqyp, tabystady.
Munan soń Mádeniet jáne sport ministri Aqtoty Raiymqulova, Jazýshylar odaǵynyń tóraǵasy, aqyn Ulyqbek Esdáýlet, TÚRKSOI uiymynyń ókili Atageldi Kúltegin Muqaǵalidyń - qazaqtyń ǵana emes, tutas túrki áleminiń, adamzattyń aqyny ekenin tilge tiek etip, toidyń rýhani mańyzyn erekshe atap ótti.
Oblys ákimi Amandyq Batalov shekaralyq aimaqqa kórsetilgen qoldaýlarǵa toqtaldy:
"Aqiyq aqynymyz Muqaǵalidyń 90 jyldyq mereitoiy úlken deńgeide atalyp ótilýde. Prezident toiǵa óz quttyqtaýyn, kópshilikke ystyq sálemin joldady. Elbasynyń qoldaýymen 2 aýdandy bólý arqyly Raiymbek aýdanynyń qaita qurylyp, búginde gúldenip jatqanyn maqtanyshpen aitamyz. Bul - Táýelsizdiktiń jemisi. Qazir shekaralyq aýmaqtaǵy aýyl turǵyndarynyń ómir súrý jaǵdaiy jaqsaryp keledi, qanshama jańa nysandar boi kóterdi, jańa úiler salyndy. 500-den astam otbasy Narynqolǵa qaita kóship keldi. 2 jarym myń jas týǵan jerine oraldy. Muqaǵalidai aqyny bar qazaq halqy baqytty. Aqynnyń rýhy jas urpaqty qoldap júrsin. Elimiz aman, jurtymyz tynysh, táýelsizdigimiz tuǵyrly bolsyn", - dedi Amandyq Batalov.
Parlament depýtaty, aqyn Maqpal Mysa, Muqaǵalidyń uly Juldyz Maqataev aqyn rýhyna arnap óz óleńderin oqydy. Budan ári mereitoi Ortalyq alańda aqynnyń sózine jazylǵan ánderdiń Gala kontsertimen jalǵasty.
Atap ótsek, eskertkishti daiyndaýǵa oblystyq biýdjetten 61,1 million teńge jumsaldy. Jumysty merdiger uiym "Taiqazan" JShS atqardy. Eskertkish qoladan quiylǵan, tuǵyry granitten daiyndalǵan. Jalpy eskertkishtiń biiktigi - 8,2 metr, avtory - sáýletshi A.Rústembekov, músinshisi - Q.Kákimov.
Sondai-aq osy kúni Narynqol aýylynda 50 otbasy baspanaly boldy. Jańa qonys ielerine turǵyn úi kiltteri saltanatty jaǵdaida tapsyryldy. Narynqol aýylynda salyna bastaǵan 83 úidiń 33-i buǵan deiin tapsyrylǵan bolatyn. Al búgin jobanyń 3 jáne 4-shi kezeńderi aiaqtalyp, 50 úi berilip otyr.
Jalpy Muqaǵali Maqataevtyń 90 jyldyq mereitoiyna daiyndyqqa Almaty oblysy ótken jyldan kirisken edi. Mereitoidy ótkizýge jergilikti biýdjetten qomaqty qarjy bólindi. Aitýly sharaǵa orai qurylǵan arnaiy jumys tobyn oblys ákimi Amandyq Batalov ózi basqaryp, ázirlikti qurylys jáne kórkeitý jumystarynan bastaǵan, ári olardyń sapaly atqarylýyn nazarda ustady.
Aldyn ala daiyndyq barysynda Qarasaz aýylyndaǵy aqyn mýzeiine, mádeniet úiine, A.Barmanbekuly atyndaǵy orta mektepke jóndeý jumystary jasalyp, nysandar jańa keiipke endi. Eldi mekenniń ortalyq kósheleri, ortalyq alańy abattandyrylyp, kóshe shamdary ornatyldy. Aýyz sý júiesi "Aýyl - el besigi" baǵdarlamasynyń aiasynda respýblikalyq biýdjetten bólingen 427,1 million teńgege qaita jańǵyrtýdan ótkizilip jatyr. Qarasaz aýylynda óner mektebin salý da - mereitoi aiasyndaǵy mańyzdy bastamalardyń biri. Qazir nysannyń jobalyq-smetalyq qujattary ázirlenýde. Aýylǵa kireberistegi Jastar saiabaǵy abattandyryldy. Irgeles Saryjaz aýylynda Raiymbek batyr eskertkishiniń mańy kórkeitilip, eskertkish janyndaǵy sý júiesi jóndeýden ótti, aýyldyń ortalyq kósheleri kóz súisiner keiipke keltirildi.
Biylǵy jyly 3 gektar aýmaǵy bar Muqaǵali atyndaǵy jańa saiabaqtyń qurylysy bastaldy. Quny 374,5 million teńgelik jobada kontserttik sahna, shaǵyn fýtbol alańy, balalar alańy, vorkaýt sport alańy, alleia, demalys aimaǵy qarastyrylǵan. Sol siiaqty aýdandyq ákimdik ǵimaratynyń janynan shaǵyn saiabaq salyna bastady. Al aýdandyq mádeniet úiiniń aldyndaǵy skver men ortalyq saiabaq tolyq abattandyryldy.
