Tuńǵyshbai myrza meniń arashama zárý emes, ol anyq. Biraq bolmai qalǵan máselede "shý" ete qalatyn bizder, mynandai iste pozitsiia kórsetpesek, onda adamdyq arymyzǵa syn bolmaq. O basta basyn ashyp alaiyq. Men ol kisiniń shákirti emespin. Maǵan ótip ketken jaqsylyǵy da joq. Eńlikgúlin almadym. Ras eki-úsh festivalda "eń úzdik er beinesin" iemdengenimde biraz jyly sózder aitqan. Basqa aralasymyz joq jandarmyz. Biraq azamat retinde óte qatty syilaityn adamym. Tuńǵyshbai aǵa Ákem teatrda direktor bolyp turǵanda men jańadan oqý bitirip TIýZ-ǵa jumysqa kirip jatqan kezim. Toqyraýdyń kezinde Teatrdy iskerligimen de, bedelimen de, jańkeshtiligimen de órge súiregen tulǵa ekenin sol kezde kórsetti Tuqań. Qanshama "qańǵyp" qalǵan jastarǵa qoldaý kórsetip jumysqa aldy. Páter bergizdi. Azamattyq pa? Álbette!
Bul kisiniń dút minezimen kóp adamǵa jaqpaityny da, shyndyqty aita salam dep talai urynǵanyn da soqyr emester kórip, bilip keldik. Qazirgi tańda mádeniet salasynda kóshi kóliksiz qalǵan, eń beisharalar basqa emes akterlar dep "qaqsap" júrip myna bizderdiń qamymyzdy jedi me? Jedi!
Eshbir memlekettik qoldaý joq "Eńlikgúl" nominatsiiasyna talai milliondardy tapty ma? Tapty!
Eshkim nazarǵa almaityn jer-jerlerdegi teatrlar qyzmetkerlerine, iaǵni býtafor, súretshiler, kostiýmerler men jaryq berýshiler, grimerlarǵa marapat úlestirildi me? Úlestirildi.
Ógei uldyń xalindegi eshkim tanymaityn periferiiadaǵy akterlar, sapasy joǵary, "gliantsty" jýrnalǵa jarqyrap shyqty ma? Shyqty!
40-50 myń ailyqpen ómirden baz keshken "baiǵustar"dyń ómirine tittei bolsa da shýaq túsirdi me? Túsirdi!
Al endi ne?
"Eńlikgúl" taratylarda quzǵynsha shýlaityn meniń áriptesterim qaida qazir? Joq! Talaiy smartfonnyń ar jaǵynda baqylap otyr ma? Otyr!
Otyra bersin. Qaitedi endi. Birdeńe dese basy bálege qalýy múmkin. Joq degende direktordan urys estigisi kelmeidi. Jaqsy túsinem. Al men urdym da qol qoidym.
Men Álbette Tuńǵyshbaidai tulǵany asqaqtatý úshin, ózgeni qaralaýdan aýlaqpyn. Tuqań kimmen ustasady onda sharýam joq. Biraq aitarym mynaý. Qandai el boldyq aǵaiyn? Qandai memleket qurdy bizdiń aǵalar? 60000000000 tan astam (60milliard) aqshany joq qylǵan eks finpol úiqamaqta. Óz kinosyna aqsha taýyp, "qoqym" tergen Tuqań tutqynda. 6 adamdy qaǵyp ekeýin mert qylǵandar bostandyqta da aýqat úshin taýyq urlaǵan túrmede. Ne boldyq biz? Men tipti sońǵy jaǵdailardan keiin aktermyn dep aitýǵa uialatyn jaǵdaiǵa jettim. Endigi tirligimiz mynaý. Tuńǵyshbailar shashylyp jatqandai tutqyndaimyz. Mazaqtaimyz. Óstip júrip óltiremiz, kórge tyǵamyz. Sosyn syqsyńdap ótirik jylaimyz. Kinolaryn kórip eske alamyz, talantyna tánti bolyp, oiynyna omaqasa qulap posmertno qaharman qylamyz. Keshirersizder, emotsiiama ie bola almai jatsam durys túsinińizder.
Ónerdegi qariialar aqsaqaldyq tanytýdyń ornyna qiia tartyp, ózgeleri bura tartyp óz bedelin kúlge aýnatqanmen qoimai kúlli akterlarǵa zalal keltirdi. Uiat tipti. Men erteńgi kúnnen uialam. Tarixtan. Biz qalasaq ta, qalamasaq ta erteń tarix bárimizdiń "bir" jerimizdi ashady. Sonda urpaq aldynda masqara bolýdan saqtanaiyq. Óz asyldarymyzdy saqtaiyq. Tuqa siz akter bolsańyz men de aktermyn. Qapa bolmańyz, jalǵyz emessiz. Biz joq degende ekeýmiz.
Nartai Saýdanbekulynyń feisbýktegi jazbasynan
