Foto: Májilis baspasóz qyzmeti
Búgin Májilis otyrysynda depýtat Nartai Sársenǵaliev áleýmettik jelide prank jasaityndar týraly sóz qozǵap, Qazaqstan Respýblikasynyń Ishki ister ministri E.S. Sadenov pen Mádeniet jáne aqparat ministri A.Ǵ. Balaevaǵa depýtattyq saýal joldady, dep habarlaidy Ult.kz.
Ol óz sózinde adamdy qorqytýdy, qoǵamdyq orynda aqymaqtyq jasaýdy qyzyq kórip ázildiń shekarasynan shyǵyp ketkender myńdap bar ekenin aitty. Sosyn, "bizdiń bloger-symaqtar shetelge baryp abyroidy airandai tógip júr" dep qynjyldy. Depýtat qazaqstandyq bloger Arýjan Aibekovanyń Qytaida «urlyq jasap jatqandai» rolik túsirgenin eske aldy.
Foto: videodan skrinshot/inbusiness.kz
"Arty úlken shý bolyp, aqyry álgi qyz jergilikti politsiiaǵa shaqyryldy. Túsindirý jumystary júrgizildi.Biraq ol túsindi me? Óitkeni dál osy blogerdiń arada az ýaqyt ótkende Tashkent metrosynda jigitterdiń qolynan ustap tiiskeni týraly beinejazba taǵy tarady. «Oiynnan da omyrtqa synatynyn» bilmeitin mundai bloger-symaqtardy qatań jaýapqa tartatyn kez keldi. Sebebi bul adamnyń jeke ómirine qol suǵý, qoǵamdyq tártipti buzý", - dedi depýtat.
Budan bólek N. Sársenǵaliev jasandy intellekt arqyly jasalatyn beinerolikter men fotolar týraly sóz qozǵady.
"Birinde memleket basshylarynyń, laýazymdy tulǵalardyń qandai da bir dúkenge saýda jasaýǵa kelgeni beinelengen. Tsifrlyq tehnologiiany bilmeitin adamnyń sanasy san saqqa júgiredi, senip qalady. Marketing úshin dep jasandy intelekt arqyly mundai jasandylyqqa júginýdi toqtatý kerek. Taǵy bir prankte balalar ata-analaryna «tanymaityn adam úige kelip tur, ne isteimiz?» dep jasandy intelekt arqyly beimálim adamnyń úige kirip ketken, páterdi aralyp júrgen sýretterin jiberedi. Záresi ushqan ata-ana politsiiaǵa telefon shalady, jumysyn tastap úiine barady. Aqyrynda bul prank dep bala-shaǵa beiqam otyrady. Dál sol ýaqytta politsiia shyn muqtaj adamǵa kómekke barýǵa úlgermei qalýy múmkin, ony internettiń inesine otyrǵandar uqpaidy", - dedi ol.
Prank jasaǵandardyń birneshe mysalyn keltirgen Nartai Sársenǵaliev quzyrly vedomstvolarǵa birneshe usynys jasady.
Depýtattyń usynystary mynandai:
1. Prank barysynda qoǵamdyq tártipti buzǵan, jeke adamnyń ómirine qol suqqandardy anyqtap, olardyń biryńǵai tizimin jasap jariialaý qajet.
2. Qaýipti prank arqyly adamnyń ar-namysy men abyroiyna qol suqqandardyń áleýmettik jelidegi paraqshalaryn dereý buǵattaý kerek;
3. Áleýmettik jeli ákimshilerinen qaýipti prankter men beinejazba jariialanǵan paraqshalardy anyqtap, ýákiletti organǵa jedel habarlaýdy talap etý qajet;
4. Mundai teris qubylystyń aldyn alý maqsatynda aqparattyq-túsindirý jumystaryn júieli túrde, nátije beretin kontent retinde júrgizý kerek.
