Frantsýz imperatory Napoleon Bonaparttyń etigi Parijde ótken bássaýdada 117 myń eýroǵa satylǵan. Bul týraly Drouot bássaýda úii málimdedi, dep jazady Massaget.kz.
Etiktiń bastapqy quny 50-80 myń eýro bolǵan. Lot anyqtamasynda Napoleon bul etikti Qasietti Elena aralyna sońǵy ret jer aýdarylǵan ýaqytta kigeni aitylǵan. Keiin etik imperatordyń músinin jasaǵan sheber Karlo Marochettige berilgen. Al músinshi etikti senator Pol Le Rýge syilaǵan. Sodan beri Napoleon etigi senatordyń otbasynda saqtalyp kelgen.
Aita keteiik, Napoleon Bonapart 1769 jyly 15 tamyzda Korsika aralynda aqsúiekter otbasynda dúniege kelgen. 1785 jylǵa deiin Brien jáne Parij áskeri mektepterinde oqyǵan. Frantsiiadaǵy 1789 - 94 jyldary revoliýtsiia kezinde Týlon qalasyn azat etkeni úshin 24 jastaǵy Napoleon I kapitandyqtan brigadalyq general dárejesine deiin kóterildi. 1796 jyly Italiiaǵa joryq jasaǵan armiianyń bas qolbasshylyǵyna taǵaiyndaldy. Osy jáne keiingi Mysyrǵa jasaǵan joryqtary kezinde ózin asa kórnekti qolbasshy retinde kórsetti. 1799 jyly 9 qarashada (18 briýmerde) biliktegi daǵdarysty paidalanyp, memlekettik tóńkeris jasady. Ol elde alǵashynda konsýldyq, odan keiin imperiia (1804 jyly 18 mamyr) túrindegi áskeri diktatýra ornatty. Iakobishilder men roialshyldarǵa soqqy berdi. Ónerkásip pen saýdany damytty. 1800 jyly frantsýz bankin qurdy. Memlekettiń qýatyn arttyrýdyń basty tiregi ónerkásipti damytý dep bildi. Áskeri óner salasynda Frantsiia áskerinde qalyptasqan jańalyqtardy odan ári jetildirdi. Tarihi jaǵdaiǵa bailanysty orasan zor áskeri kúshti taktikalyq jáne strategiialyq jaǵynan tiimdi paidalana bildi. Onyń áskeri qaǵidasy: "San jaǵynan álsizdikti qimyldyń jyldamdyǵymen toltyrý" boldy. 1804 jylǵa deiin respýblika atyn jamylyp kelgen diktatorlyq ókimetti býrjýaziialyq memleketti nyǵaitýǵa paidalandy. Direktoriia kezinde saqtalǵan basqarý júiesin joidy.
5 mamyr 1821 jyly Napoleon Bonapart qaitys boldy. Onyń óliminiń sebebi áli kúnge deiin belgisiz. Napoleon qaterli isikten nemese ýlanyp ólýi múmkin degen boljam bar.
