Koronavirýs infektsiiasyn juqtyrǵan burynǵy densaýlyq saqtaý vitse-ministri Kamaljan Nadyrov halyqty saqtanýǵa shaqyrdy, dep habarlaidy "Ult aqparat".
«Qurmetti dostar, áriptester! Ózderińiz biletindei, qazir men elordadaǵy statsionarlardyń birinde jatyrmyn. Maǵan qatysty jańalyq osynshama rezonans týǵyzar dep oilaǵan joqpyn. Qoldaý bildirgen lebizderdi oqyp jatyrmyn. Qoldaýlaryńyz maǵan kúsh beredi. Sizderge kóp rahmet», - dep jazdy Kamaljan Nadyrov Facebook paraqshasynda.
Burynǵy vitse-ministr aýrýdy jeńil kóterip jatqanyn aitady.
«Dárigerler barynsha jigerli ári úilesimdi, kásibi jumys isteýde. Osy ýaqytqa deiin sheberligin shyńdaǵany kórinip tur. Olar naǵyz Batyrlar! Olarǵa taǵzym etem. Qyzmet babymen aimaqtardy aralap, áriptestermen kezdesip, aýrýhanalarda boldym. Aýrýdy juqtyryp alý qaýpin eskere otyryp, COVID-19 boiynsha qaita-qaita testileýden de ótip júrdim. Buryn test nátijeleriniń bári de juqtyrmaǵanymyzdy kórsetken edi. Biraq keshe keshke nátije basqasha bolyp shyqty. Bul bizdiń kózge kórinbeitin jaýymyzdyń qanshalyqty zulym ekenin taǵy bir márte kórsetip otyr», - deidi ol.
Kamaljan Nadyrov emhanaǵa jatpaǵanda Almaty qalasynyń qoǵamdyq densaýlyq saqtaý basqarmasynyń basshysy qyzmetinde jumysyn bastaýy kerek edi.
«Qalai saýyǵam, solai qatarǵa qaita qosylyp, ózime tapsyrylǵan aýmaqta jumysymdy jalǵastyra beremin. Ázirshe qashyqtan eńbek etemin. Qazaqstandyqtarǵa taǵy da aitarym: virýs biz oilaǵannan da jaýyz. Onyń kei adamnyń boiynda kórinbei tirshilik etýi – bizdiń diagnostikany kúrdelendire túsedi. Sol sebepti aldyn alýdyń barlyq qamyn qarastyrǵan abzal. Oqshaýlaný kerek. Ózderińizdi saqtańyzdar!» - dep jazady Kamaljan Nadyrov.
