Prezidenttiń «Rýhani jańǵyrý» baǵdarlamasyn jáne «Uly dalanyń jeti qyry» maqalasyn júzege asyrý aiasynda Mysyr Arab Respýblikasyndaǵy QR Elshiliginiń qoldaýymen ál-Farabi atyndaǵy Qazaq ulttyq ýniversiteti Kair ýniversitetinde ál-Farabi ǵylymi-bilim ortalyǵyn ashty.
Ortalyqtyń ashylýy barysynda «Ál-Farabidiń filosofiialyq murasy» halyqaralyq ǵylymi seminary uiymdastyryldy. Farabitanýshy ǵalymdar, Kair ýniversitetiniń filosoftary, QazUÝ rektory, akademik Ǵalym Mutanov, Mysyrdaǵy QR Elshisi Arman Isaǵaliev Shyǵystyń uly oishyl muralary jáne óskeleń urpaqtyń rýhani-ónegelik tárbiesindegi onyń ideiasynyń ózektiligi jaily baiandamalar jasady.
Qazaqstandyq jetekshi joǵary oqý ornynyń rektory ál-Farabidiń izgilikti qoǵam ideiasyna negizdelgen «Izgilikti qoǵam azamatyn qalyptastyrý. Zamanaýi ýniversitetter missiiasy» halyqaralyq jobasynyń BUU Órkenietter Aliansymen birlese júzege asýy jaily aitty. Ol Kair ýniversitetindegi ál-Farabi ortalyǵy tek ál-Farabi, Beibarys Sultan muralaryn ǵana emes, dostas memleketter arasyndaǵy ortaq tarihi jáne mádeni qundylyqtardy oqytyp, nasihattaityn jaqsy platforma qyzmetin atqaratynyna senim bildirdi. Mysyrdaǵy Qazaqstan Elshiliginiń bastamasymen osy jyldan bastap ál-Farabi ortalyǵy bazasynda birinshi ret Kair ýniversitetinde qazaq tilin oqytý páni engiziledi.
Sapar aiasynda qazaqstandyq delegatsiia men Bas imam ál-Azhar sheih Ahmad at-Taieb, Joǵary bilim jáne ǵylymi zertteýler ministri Haled Abdel-Gaffar, EAR Parlamenti bilim berý jáne ǵylymi zertteýler isteri boiynsha Komitet tóraǵasy Sami Hashim, Kair ýniversitetiniń rektory Mohammed Osman ál-Hosht jáne «Gomhýriia» gazetiniń bas redaktory Abdel-Razek Taýfik aralarynda qurylymdyq dialog órbidi.
Kezdesý barysynda birlese mamandar daiarlaýda ózara áriptestikti nyǵaitý, akademiialyq almasý baǵdarlamasyn, magistranttar men doktoranttardyń ǵylymi taǵylymdamalaryn júzege asyrý, oqytýshylar biliktiligin arttyrý, ǵylymi-bilim berý baǵdarlamalaryn jasaý, farabitaný kýrstaryn engizý suraqtary qarastyryldy. Mysyrdan QazUÝ filialyn ashý jaily kelisim is-sapardyń mańyzdy sátine ainaldy. Taraptar 2020 jyly uly oishyl ál-Farabidiń 1150 jyldyǵyn ótkizýge jáne daiyndyq júrgizýde birlesken jumystar jasaýǵa daiyn ekendikterin jetkizdi.
QazUÝ delegatsiiasy quramyndaǵy tanymal kinorejisser S. Ázimovtiń túsirý toby qazirgi ýaqytta túsirilip jatqan ál-Farabi jáne Beibarys Sultan týraly kórkem filmderge qajetti videomaterialdar jinaý úshin Mysyrdaǵy tarihi-mádeni nysandardy (Beibarys Sultan meshiti men kitaphanasy jáne t.b.) aralady.
