«Bizneske arnalǵan Úkimet» portaly memleket tarapynan kásipkerlerge kórsetiletin 570 qyzmetti onlain platformaǵa shyǵarady, dep habarlaidy QazAqparat.
«Atameken» ulttyq kásipkerler palatasynyń basqarma tóraǵasy Abylai Myrzahmetov Úkimet otyrysynda osyndai málimet aitty.
«Memleket qoldaýynyń arqasynda «Atameken» aýdan ortalyqtarynda shaǵyn kásipkerlerge aqparattyq kómek kórsetip otyr. Iaǵni, qandai jobalarǵa qalai qatysýǵa bolady degen siiaqty suraqtarǵa jaýap beremiz. 2019 jyldan bastap bul qyzmettiń bári onlain túrde kórsetile bastady. Ótken jyly qyzmettiń 30 paiyzy onlain kórsetilse, birinshi toqsanda 50 paiyzǵa jetti. Jyldyń aiaǵynan, kelesi jyldyń basynan tolyq 100 paiyz onlainǵa kóshý týraly talap qoiyp otyrmyz», - deidi palata tóraǵasy.
Onyń sózine qaraǵanda «Atameken» kórsetetin kómektiń eń negizgi túri – býhgalterlik nemese salyq esebin ótkizý kómegi. Quqyqtyq, memlekettik tapsyrystarǵa qatysý, marketing boiynsha da kómek suraityndar kóp kórinedi.
«Osy 4 qyzmet barlyq kórsetiletin qyzmettiń 80 paiyzyn alyp jatyr. Memleket basshysy «Bizneske arnalǵan Úkimet» portalyn qurý týraly tapsyrma bergen bolatyn. Osy jobada «Atamekenge» tiisti zańnamalyq quzyret berildi. Úkimetpen tiisti kelisimshartqa qol qoidyq. Iaǵni, kásipkerlerge beriletin qyzemttiń bárin «bir tereze arqyly» tsifrlyq formatta berý kózdelip otyr. Aita ketsek, 32 qarjylyq kómektiń bárine (sýbsidiia alý, memlekettik kepildeme alý qyzmetter jáne t.b.) jáne qarjylyq emes kómektiń bárine atsalysamyz», - degen Abylai Myrzahmetov «Bizneske arnalǵan Úkimet» portalynyń kelesi jyly qoldanysqa beriletinin atap ótti.
«Orta eseppen kásipkerlerge memlekettik organdar 570 kómek beredi. Osy qyzmettiń bári atalmysh portalda biriktiriledi. Jyl aiaǵyna deiin aiaqtalyp, kelesi jyldan bastap barlyq qyzmet, kómek kórsetý sharalary kásipkerlerge tsifrly túrde beriledi», - dedi «Atameken» basshysy.
