Qyzylorda oblysynda jyl saiyn munai óndirý kólemi 1 mln tonnaǵa deiin tómendep jatyr. Bul týraly búgin Úkimet otyrysynda QR Ekologiia, geologiia jáne tabiǵi resýrstar ministri Maǵzum Myrzaǵaliev aitty, dep habarlaidy "Ult aqparat".
«QR Prezidenti Qasym-Jomart Toqaevtyń tapsyrmasyna sáikes Geologiialyq barlaýdyń 2021-2025 jyldarǵa arnalǵan memlekettik baǵdarlamasynyń tujyrymdamasy ázirlendi. Bul máselege Memleket basshysy byltyr 5 qyrkúiekte Atyraý qalasynda ótken munai-gaz salasyna qatysty keńeste basa nazar aýdardy. Negizi elimizde 8 myńǵa jýyq ken orny tirkelgen. Onyń ishinde 317 kómirsýtek, iaǵni munai, gaz, kondensat ken oryndary bar. Munan bólek, 910 qatty paidaly qazbalar ken orny bolsa, 3 myńnan astamy keń taralǵan paidaly qazbalarǵa tiesili. Sonymen qatar 4 myńǵa jýyǵy jerasty sýlary ken orny bar», - dedi tujyrymdamany tanystyrǵan ministr.
Onyń aitýynsha, búgingi kúni birqatar ózekti másele kún tártibinde tur. Atap aitqanda, monoqalalardaǵy taý-ken kásiporyndarynyń shikizat bazasynyń turaqsyzdyǵy, paidaly qazba qorlarynyń azaiýy jáne «baiyrǵy» ken oryndarynda óndirý kóleminiń tómen deńgeige túsýi ózekti bolyp otyr.
Mysaly, Qyzylorda oblysynda jyl saiyn munai óndirýdiń kólemi 1 mln tonnaǵa deiin tómendeýde. Osy másele taiaý arada Aqtóbe men Mańǵystaý oblystarynda da boljanýda. Sońǵy on jyldyqta Shyǵys Qazaqstandaǵy monoqalalarǵa jaqyn ornalasqan – Shemonaiha, Iýbileino-Snegirihinskoe, Zyrianovskoe iri qorǵasyn-myrysh ken oryndarynyń qory túgeldei taýsylyp, jabyldy. 2025-2040 jyldarǵa taman Orlovskoe, Maleevskoe, Tishinskoe, Ridder-Sokolnoe siiaqty ken oryndarynda da paidaly qazba qorlarynyń tolyqtai sarqylýy kútilýde», - dedi Maǵzum Myrzaǵaliev.
