- Rio-de-Janeirodaǵy HHHI Jazǵy Olimpiadanyń bokstyń shirek finaldyq kezeńinde qazaqstandyq boksshy Birjan Jaqypov óte nashar bokstasty. Bul týraly bokstan Qazaqstan ulttyq quramasynyń bas bapkeri Myrzaǵali Aitjanov jarystan keiin, Riodaǵy QazAqparat tilshisine bergen suhbatynda málim etti.
- Myrzaǵali Qulanuly, búgin bir shákirtińiz jeńilip, bir boksshyńyz jartylai finalǵa ótti. Osy jaiynda qysqasha toqtalyp ótseńiz...
- Búgingi jekpe-jekte Birjan óte nashar bokstasty. men olai bolady dep oilaǵan joqpyn. Sebebi, Birjannyń tájiribesi jaǵynan bolsa da, fizikalyq qýattylyǵy jaǵynan bolsa da, qarsylasyn utatyn múmkindigi bolyp edi. Biraq, boksta osyndai jaǵdailar kóp kezdesedi.
- Múmkindigi bola tura qalai jeńilip qaldy?
- Birjandy ózderińiz bilesizder, úshinshi Olimpiadasyna qatysyp otyr. Biyl qalai da medal alam degen úmiti boldy. Ókinishke qarai, medaldyń syńǵyry jaqyndaǵan sátte ózin-ózi kúidirip aldy. Óz-ózin basqara almady, óz-ózin ustai almady.
- Oǵan jarysqa shyǵar aldynda qandai tapsyrma berdińiz?
- Birjanǵa keshe jattyǵý kezinde de, búgin jarysqa shyǵar aldynda da qalai jumys jasaý kerek ekendigin jaqsylap turyp aittym. Ókinishke qarai, boiy kip-kishkentai boksshyǵa aiaqtan turyp bere almady. Qazaqsha aitqanda, aýzy ańqiyp, ózin-ózi joǵaltyp aldy. Bul orny tolmas ókinishti jaǵdai. Sonsha jyl daiyndaldy. Bir emes, úsh Olimpiadaǵa qatysyp otyryp, shirek finalda jeńilip qalý máńgi ókinish bolyp qalady-aý.
- Bul jeńilistiń endi ornyn toltyrý múmkin be?
- Birjan úshin múmkin emes. Bul "buiyrmaǵan" degen sóz. Keibir baqyt qansha qýsań da jetkizbeidi. Úsh Olimpiadaǵa qatysyp otyryp bir medalǵa qol jetkize almaý sportshyǵa óte aýyr jaǵdai. Jalpy, Olimpiada medali kez-kelgen sportshyǵa buiyra bermeidi. Men buny tek Birjan utylǵannan keiin aityp otyrǵanym joq. Bul sport tarihynda, boks tarihynda bar nárse.
- Birjannyń jeńilisi sizge de aýyr tigen bolar?
- Men óz mindetimdi oryndadym. Quramadaǵy 10 boksshyny birinen birin artyq, ne kem kórgen jerim bolǵan joq. Barlyǵyn birdei bir ýaqytta, bir jerde jattyqtyrdym. Eshkimniń maǵan ókpesi joq dep oilaimyn. Biraq, "Birjan jeńildi" dep basymyzdy salbyratpaimyz. Basqa da jigitterimiz bar. Endi sol jigitterimizge Alla kúsh-qýat bersin. Olardy aldaǵy jekpe-jekterge tyńǵylyqty daiyndaimyz.
- Al Vasilii Levit týraly kishkene toqtala ketseńiz...
- Vasiliidiń judyryqtasý máneri kóńilimnen shyqty. Ol alǵashqy sekýndtardan bastap, tizgindi óz qolyna aldy. Ringtiń qojaiyny siiaqty bokstasty. Eshteńeden qaimyqpai, qorǵanbai qarsylasyn qýyp júrip sabady desem de bolady. Ol qazir medalǵa ilinip tur. Biraq, qolda medal bar dep qanaǵattanýǵa qaqymyz joq. Endi, ary qarai medaldyń sapasyn jaqsartýǵa jumys jasaimyz.
- Áńgimeńizge kóp rahmet!
Kúnsultan Orazbai, QazAqparat
