Foto: Almaty oblysynyń ákimdigi
Álemdik jetistik sertifikatyn Ginnestiń rekordtar kitabynyń ókili Richard-Ýiliam Stenning tabystady, dep habarlaidy Almaty oblysynyń ákimdigi.
Almaty oblysynda bir órkeshti myń túieden quralǵan kerýen resmi túrde Ginnestiń rekordtar kitabyna endi. Bir shaqyrym qashyqtyqty júrip ótken kerýen 20 qyrkúiekte Ile aýdanynyń Kúrti aýylynda uiymdastyrylǵan bolatyn.
Ginnestiń rekordtar kitabynyń ókili Richard-Ýiliam Stenning qazaqstandyq jobanyń ereksheligine erekshe toqtald.
— Bul — airyqsha jaǵdai. Ózge elderde mundai kerýender ártúrli adamdardyń janýarlarynan quralady — birinde tórt túie, ekinshisinde eki túie bolady. Al Qazaqstanda myń túieniń bári bir adamnyń ieliginde. Bul — rekordty shynymen de erekshe ári biregei etedi. Qazaqstan meni tańǵaldyrdy, endi bul elge týrist retinde de kelgim keledi, — dedi ol.
Almaty oblysynyń ákimi Marat Sultanǵaziev te bul oqiǵanyń el úshin mańyzyn atap ótti.
— Rekordtyń resmi túrde moiyndalýy — bizdiń ulttyq rýhymyz ben mádeni muramyzǵa kórsetilgen úlken qurmet. Myń túieden quralǵan kerýen halyqty biriktirip, qazaq dástúriniń simvolyna ainaldy, — dedi aimaq basshysy.
Ideia avtory ári kerýen iesi, «Daýlet-Beket» JShS direktory Sydyq Dáýletov jobany daiyndaýǵa jarty jyl ýaqyt ketkenin aitty.
— Túie — erkindikke úirengen janýar. Myń túieni birge jinaý ońai bolǵan joq. Biraq maqsat pen senim bolsa, múmkin emes dúnie joq. Aldaǵy ýaqytta shubat festivalin ótkizýdi josparlap otyrmyz. Halyqqa osyndai dástúrimizdi jańǵyrtatyn sharalar qajet, — dedi ol.
Esterińizge sala keteiik, qyrkúiekte álemdegi eń úlken túie kerýeni Almaty oblysy Ile aýdanynyń Kúrti aýyldyq okrýginde júrip ótken bolatyn.
