«Myń bala» olimpiadasynyń 5 myń finalisi Elbasy Akademiiasynyń Virge oqý onlain mektebinde tegin bilim alady. Bul týraly Ortalyq kommýnikatsiialar qyzmetinde ótken baspasóz máslihatynda «Elbasy Akademiiasy» korporativtik qorynyń basqarýshy direktory Ánýar Janǵozin aitty, dep habarlaidy QazAqparat.
Onyń atap ótýinshe, aýyldyq jerlerdegi daryndy oqýshylardyń qabiletin damytýǵa jáne qoldaýǵa baǵyttalǵan «Myń bala» olimpiadasy eki jyl ishinde 5-6 synyptaǵy 400 myńnan astam oqýshyny qamtydy.
Biyl olimpiada alǵash ret onlain formatta ótti.
«Olimpiadaǵa 5-6 synyptyń 150 myńǵa jýyq oqýshysy tirkeldi. I kezeńge 96 myńnan astam oqýshy qatysty. Alǵashqy kezeńniń nátijesimen óńirler bólinisinde eń joǵary nátije kórsetken 5000 finalist irikteldi. Olardyń ortasha baly 400 balldan 343 balldy quraǵanyn atap ótý kerek. Bul aýyl oqýshylarynyń joǵary daǵdylyq deńgeiin kórsetedi», - dedi «Elbasy Akademiiasy» KQ basqarýshy direktory.
Ánýar Janǵozinnyń aitýynsha, II kezeńge 5 myń finalist ótip, aýyldyń eń qabiletti myń oqýshysy jeńimpaz atandy.
Olar endi elimizdiń daryndy balalarǵa arnalǵan jetekshi mektepterinde, atap aitqanda, Respýblikalyq fizika-matematika mektebinde, «Bilim-Innovatsiia» litseilerinde jáne «Daryn» mamandandyrylǵan mektepterinde, Elbasy Akademiiasy Birge Oqý onlain mektebinde oqidy.
QR Bilim jáne ǵylym ministrliginiń qoldaýymen Nursultan Nazarbaev Qory men Elbasy Akademiiasy uiymdastyrǵan olimpiadanyń 5 myń finalisi Virge oqý onlain mektebinde tegin oqidy.
Onlain mektepte elimizdiń eń úzdik ustazdary aýyl oqýshylary úshin qosymsha sabaq beredi.
Sabaqtar sinhrondy jáne asinhrondy formatta uiymdastyrylǵan. Oqý protsesi eki aýysymda júrgiziledi. 2020-2021 oqý jylynda 9 myńnan astam onlain sabaq ótken.
Sabaq jiiligi: aptasyna 5 saǵat. Sabaqtyń uzaqtyǵy: 1 saǵat. Qazir onlain mektepte 42 muǵalim sabaq beredi.
Olar: óńirlik Nazarbaev Ziiatkerlik mektepteriniń, Respýblikalyq fizika-matematika mektebiniń jáne Nur-Sultan qalasy litseileriniń ustazdary.
«Biz dástúrli oqytýdy onlain-analogtarmen almastyrýdy maqsat etpeimiz. Sonymen qatar, onlain oqytý dástúrli mektepti sátti tolyqtyra alatynyn kórdik. Sondyqtan, jaqyn arada biz 10-11 synyp oqýshylaryn tek aýyl mektepterine ǵana emes, qala mektepterine de oqytý úshin jobany keńeitýdi josparlap otyrmyz jáne qosymsha 10 myńǵa jýyq oqýshyny, onyń ishinde kóp balaly jáne az qamtylǵan otbasylardan shyqqan balalardy da qamtýǵa daiynbyz. Tildik quzyretter men matematikalyq saýattylyq daǵdylaryn damytýǵa basa nazar aýdarylady. Sondai – aq, bitirýshi synyp oqýshylaryn daiarlaý úshin UBT-nyń mindetti pánderin engizý múmkindigin qarastyramyz», - dedi Ánýar Janǵozin.
