Mýzeiler men kitaphanalarǵa tabys tabýǵa múmkindik beriletin bolady.
Bul týraly Májilistiń jalpy otyrysynda QR Mádeniet jáne sport ministri Aqtoty Raiymqulova aitty, dep habarlaidy "Ult aqparat".
«Qoldanystaǵy «Mádeniet týraly» zańda mýzeiler men kitaphanalar iske asyrýǵa quqyly aqyly qyzmet túrleriniń tizimi jáne olardan paida tabý tártibi qarastyrylǵan. Tizim sol kezde memlekettik mekeme nysanynda jumys istegen kitaphanalar men mýzeilerge quqyq berý úshin zańǵa engizilgen bolatyn. Biýdjet zańnamasynyń talaptaryna sáikes, eger aqyly qyzmetter quqyǵy salalyq zańdarda kózdelmese kommertsiialyq emes bolyp tabylatyn memlekettik mekemelerdiń nysanynda qurylǵan uiymdardyń bundai qyzmetke quqyǵy joq», - dedi ministr «Qazaqstan Respýblikasynyń keibir zańnamalyq aktilerine mádeniet máseleleri boiynsha ózgerister men tolyqtyrýlar engizý týraly» zań jobasyn tanystyrý barysynda.
Alaida, ministrdiń aitýynsha, búgingi kúni Qazaqstannyń kóptegen mýzeileri memlekettik kásiporynǵa ainalǵan. Osy oraida, qoldanystaǵy zańda mýzeiler men kitaphanalarǵa tabys tabýǵa múmkindik beretin norma kásiporyndardyń aqyly qyzmet kórsetý aiasyn shektep otyr.
«Osyǵan orai zań jobasynda osy normanyń qoldanylýyn mekemeler túrinde qurylǵan uiymdarǵa ǵana qoldaný usynylyp otyr. Kásiporyndar «Memlekettik múlik týraly» Zańynyń talaptarynyń aiasynda iske asyratyn bolady. Sonymen qatar, osy zań jobasy aiasyndaǵy eń mańyzdy normalarynyń biri, ol memleket 100 paiyz qatysatyn uiymdardy jekeshelendirýge tyiym salatyn túzetý bolyp tabylady», - dedi Aqtoty Raiymqulova.
