Búgin kúlli musylman úshin ulyq sanalatyn Qurban ait merekesi bastaldy, dep habarlaidy "Ult aqparat".
Oraza aittan keiin 70 kún ótkende keletin Qurban ait merekesin kópshilik musylman 3 kún qatarynan toilaidy. Biylǵy Qurban ait merekesi ǵulamalar keńesiniń bekitýimen 31 shilde, 1-2 tamyz kúnderine sáikes kelip tur. Iaǵni ulyq merekeniń alǵashqy kúni – qasietti jumaǵa dóp keldi. Áitse de, elimizdegi karantin merzimi 2 tamyzǵa deiin uzartylǵandyqtan, respýblika boiynsha meshitter jabyq. Osyǵan bailanysty 31 shilde kúni Qurban ait namazy oqylmaidy.
Eldegi epidemiologiialyq ahýal Qurban ait meiramyn jyldaǵydai merekeleýge múmkindik bermei tur. Bul jaǵdaiǵa buǵan deiin Qazaqstan musylmandary dini basqarmasy túsinistikpen qaraýǵa shaqyrǵan bolatyn.
Merekeniń basty rásimi – jaratýshy razylyǵy úshin qurban shalý. Bul rásim dini nanym boiynsha Ibrahim paiǵambar zamanynan beri kele jatyr dep esepteledi. Qurban shalý ulyq ǵibadat ári jaǵdaiy kelgen musylmanǵa ýájip. Osynaý ǵibadatty oryndaý maqsatynda Qazaqstan Musylmandary dini basqarmasy halyqtyń ótinishin eskere otyryp, biyl alǵash ret Qurban ait qarsańynda halyqaralyq tájiribelerge súienip, qashyqtan qurban shalý jobasyn qolǵa aldy. Osy maqsatta qurban2020.kz saity ashylyp, 24 shildeden bastap táýlik boiy jumys istei bastady. 30 shildege deiin qurban shalýǵa onlain tapsyrys qabyldandy. Kez kelgen azamat onlain qurban shalýǵa tapsyrys bere alady.
Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanulynyń aitýynsha, onlain rejimde tapsyrys qabyldap, qurbandyq etin muqtaj jandarǵa taratý tájiribesi Túrkiia, Malaiziia, Indoneziia, BAÁ syndy birqatar musylman memlekette burynnan qalyptasqan jáne dástúrge ainalǵan.
«Bul júieniń basty ereksheligi – qurbandyq eti túgeldei muqtaj jandarǵa taratylady. Alǵash ret iske qosylǵaly turǵan saitta kemshilikter bolýy múmkin. Tehnikalyq qiyndyqtar týyndasa, qurmetti halaiyq, túsinistikpen qaraýdy ótinemiz. Onlain qurbandyq júiesin ashýdaǵy maqsat – syn-saǵatta paida tabý emes, halyqtyń qurban shalýǵa degen qajettigin qamtamasyz etý. Dini basqarmanyń maqsaty – azamattardyń qurbandyǵyn shalýdy uiymdastyrý. Onlain tapsyrys arqyly qurbandyq shalý kezinde daǵdyǵa ainalǵan maldy tańdaý, qasapshy janyna baryp qatysý múmkindigi bolmaiyn dep tur. Bul jobany karantin kezinde qurban shalǵysy kelgen azamattardyń nietin júzege asyrý múmkindigi retinde usynyp otyrmyz. Alla qalasa, atalmysh joba kelesi jyly óz jalǵasyn tabady dep úmittenemiz. Onlain qurbandyq shalýda imamdarymyz deldaldyq qyzmet jasamaidy. Eki ortada júrip paida tabýmen ainalyspaidy. Bizdiń mindet – halyqqa qyzmet, qurbandyq shalýdy uiymdastyrý men qurban etterin muqtaj jandarǵa úlestirip berý ǵana», - degen edi Naýryzbai qajy Taǵanuly Ortalyq kommýnikatsiialar qyzmetinde ótken baspasóz máslihatynda.
Osy kezge deiin azamattar qurban etin úshke bólip, bir bóligine aǵaiyn-týys, kórshi-qolańǵa ait dastarhanyn jaiatyn. Pandemiia jaǵdaiyna bailanysty biylǵy onlain qurbandyq shalynǵanda ettiń úshten biri berilmei, túgeldei áleýmettik turǵyda az qamtylǵan azamattarǵa, muqtaj jandarǵa úlestiriletin boldy.
Karantin kezinde onlain qurbandyq shalý jobasyna memleketimiz qoldaý kórsetip otyr. Ár oblysta qurban shalatyn oryndar belgilenip, jergilikti ákimdik pen sanitarlyq dárigerlerdiń ruqsatymen, tártip saqshylarynyń qadaǵalaýymen karantin talaptaryn qatań túrde saqtai otyryp oryndalady.
Bul rette Naýryzbai qajy Taǵanuly ár oblystyń dini ahýalyna jaýap beretin mekemelerdi dini basqarmanyń oblystyq ókildikterimen birge jumys isteýge shaqyrdy. Osy maqsatta dini basqarma men oblystyq meshitter janynan aqparat ortalyqtary da qurylǵan. Onlain qurbandyq týraly bilgisi keletin azamattar osy ortalyqtarǵa habarlasa alady.
Qazaqstan musylmandarynyń dini basqarmasy halyqty osyndai qiyn-qystaý kezde pendeshilikke salynbai, paida tabý men alypsatarlyqqa barmai, mal baǵasyn qymbattatpaýǵa, halyqtyń jaǵdaiyn eskerýge shaqyrady. Qasapshylar da óz qyzmetine alatyn aqysyn qymbattatpai, janashyrlyqpen elge qyzmet eter dep úmittenedi.
Qurban shalý úshin oblys, qala ákimderin, sanitarlyq-epidemiologiialyq basqarma qyzmetkerlerin tártip saqshylarymen birlesip atsalysýǵa úndeidi.
