بٷگٸن كٷللٸ مۇسىلمان ٷشٸن ۇلىق سانالاتىن قۇربان ايت مەرەكەسٸ باستالدى, دەپ حابارلايدى "ۇلت اقپارات".
ورازا ايتتان كەيٸن 70 كٷن ٶتكەندە كەلەتٸن قۇربان ايت مەرەكەسٸن كٶپشٸلٸك مۇسىلمان 3 كٷن قاتارىنان تويلايدى. بيىلعى قۇربان ايت مەرەكەسٸ عۇلامالار كەڭەسٸنٸڭ بەكٸتۋٸمەن 31 شٸلدە, 1-2 تامىز كٷندەرٸنە سەيكەس كەلٸپ تۇر. ياعني ۇلىق مەرەكەنٸڭ العاشقى كٷنٸ – قاسيەتتٸ جۇماعا دٶپ كەلدٸ. ەيتسە دە, ەلٸمٸزدەگٸ كارانتين مەرزٸمٸ 2 تامىزعا دەيٸن ۇزارتىلعاندىقتان, رەسپۋبليكا بويىنشا مەشٸتتەر جابىق. وسىعان بايلانىستى 31 شٸلدە كٷنٸ قۇربان ايت نامازى وقىلمايدى.
ەلدەگٸ ەپيدەميولوگييالىق احۋال قۇربان ايت مەيرامىن جىلداعىداي مەرەكەلەۋگە مٷمكٸندٸك بەرمەي تۇر. بۇل جاعدايعا بۇعان دەيٸن قازاقستان مۇسىلماندارى دٸني باسقارماسى تٷسٸنٸستٸكپەن قاراۋعا شاقىرعان بولاتىن.
مەرەكەنٸڭ باستى رەسٸمٸ – جاراتۋشى رازىلىعى ٷشٸن قۇربان شالۋ. بۇل رەسٸم دٸني نانىم بويىنشا يبراھيم پايعامبار زامانىنان بەرٸ كەلە جاتىر دەپ ەسەپتەلەدٸ. قۇربان شالۋ ۇلىق عيبادات ەرٸ جاعدايى كەلگەن مۇسىلمانعا ۋەجٸپ. وسىناۋ عيباداتتى ورىنداۋ ماقساتىندا قازاقستان مۇسىلماندارى دٸني باسقارماسى حالىقتىڭ ٶتٸنٸشٸن ەسكەرە وتىرىپ, بيىل العاش رەت قۇربان ايت قارساڭىندا حالىقارالىق تەجٸريبەلەرگە سٷيەنٸپ, قاشىقتان قۇربان شالۋ جوباسىن قولعا الدى. وسى ماقساتتا qurban2020.kz سايتى اشىلىپ, 24 شٸلدەدەن باستاپ تەۋلٸك بويى جۇمىس ٸستەي باستادى. 30 شٸلدەگە دەيٸن قۇربان شالۋعا ونلاين تاپسىرىس قابىلداندى. كەز كەلگەن ازامات ونلاين قۇربان شالۋعا تاپسىرىس بەرە الادى.
قازاقستان مۇسىلماندارى دٸني باسقارماسىنىڭ تٶراعاسى, باس مٷفتي ناۋرىزباي قاجى تاعانۇلىنىڭ ايتۋىنشا, ونلاين رەجيمدە تاپسىرىس قابىلداپ, قۇرباندىق ەتٸن مۇقتاج جاندارعا تاراتۋ تەجٸريبەسٸ تٷركييا, مالايزييا, يندونەزييا, باە سىندى بٸرقاتار مۇسىلمان مەملەكەتتە بۇرىننان قالىپتاسقان جەنە دەستٷرگە اينالعان.
«بۇل جٷيەنٸڭ باستى ەرەكشەلٸگٸ – قۇرباندىق ەتٸ تٷگەلدەي مۇقتاج جاندارعا تاراتىلادى. العاش رەت ٸسكە قوسىلعالى تۇرعان سايتتا كەمشٸلٸكتەر بولۋى مٷمكٸن. تەحنيكالىق قيىندىقتار تۋىنداسا, قۇرمەتتٸ حالايىق, تٷسٸنٸستٸكپەن قاراۋدى ٶتٸنەمٸز. ونلاين قۇرباندىق جٷيەسٸن اشۋداعى ماقسات – سىن-ساعاتتا پايدا تابۋ ەمەس, حالىقتىڭ قۇربان شالۋعا دەگەن قاجەتتٸگٸن قامتاماسىز ەتۋ. دٸني باسقارمانىڭ ماقساتى – ازاماتتاردىڭ قۇرباندىعىن شالۋدى ۇيىمداستىرۋ. ونلاين تاپسىرىس ارقىلى قۇرباندىق شالۋ كەزٸندە داعدىعا اينالعان مالدى تاڭداۋ, قاساپشى جانىنا بارىپ قاتىسۋ مٷمكٸندٸگٸ بولمايىن دەپ تۇر. بۇل جوبانى كارانتين كەزٸندە قۇربان شالعىسى كەلگەن ازاماتتاردىڭ نيەتٸن جٷزەگە اسىرۋ مٷمكٸندٸگٸ رەتٸندە ۇسىنىپ وتىرمىز. اللا قالاسا, اتالمىش جوبا كەلەسٸ جىلى ٶز جالعاسىن تابادى دەپ ٷمٸتتەنەمٸز. ونلاين قۇرباندىق شالۋدا يمامدارىمىز دەلدالدىق قىزمەت جاسامايدى. ەكٸ ورتادا جٷرٸپ پايدا تابۋمەن اينالىسپايدى. بٸزدٸڭ مٸندەت – حالىققا قىزمەت, قۇرباندىق شالۋدى ۇيىمداستىرۋ مەن قۇربان ەتتەرٸن مۇقتاج جاندارعا ٷلەستٸرٸپ بەرۋ عانا», - دەگەن ەدٸ ناۋرىزباي قاجى تاعانۇلى ورتالىق كوممۋنيكاتسييالار قىزمەتٸندە ٶتكەن باسپاسٶز مەسليحاتىندا.
وسى كەزگە دەيٸن ازاماتتار قۇربان ەتٸن ٷشكە بٶلٸپ, بٸر بٶلٸگٸنە اعايىن-تۋىس, كٶرشٸ-قولاڭعا ايت داستارحانىن جاياتىن. پاندەمييا جاعدايىنا بايلانىستى بيىلعى ونلاين قۇرباندىق شالىنعاندا ەتتٸڭ ٷشتەن بٸرٸ بەرٸلمەي, تٷگەلدەي ەلەۋمەتتٸك تۇرعىدا از قامتىلعان ازاماتتارعا, مۇقتاج جاندارعا ٷلەستٸرٸلەتٸن بولدى.
كارانتين كەزٸندە ونلاين قۇرباندىق شالۋ جوباسىنا مەملەكەتٸمٸز قولداۋ كٶرسەتٸپ وتىر. ەر وبلىستا قۇربان شالاتىن ورىندار بەلگٸلەنٸپ, جەرگٸلٸكتٸ ەكٸمدٸك پەن سانيتارلىق دەرٸگەرلەردٸڭ رۇقساتىمەن, تەرتٸپ ساقشىلارىنىڭ قاداعالاۋىمەن كارانتين تالاپتارىن قاتاڭ تٷردە ساقتاي وتىرىپ ورىندالادى.
بۇل رەتتە ناۋرىزباي قاجى تاعانۇلى ەر وبلىستىڭ دٸني احۋالىنا جاۋاپ بەرەتٸن مەكەمەلەردٸ دٸني باسقارمانىڭ وبلىستىق ٶكٸلدٸكتەرٸمەن بٸرگە جۇمىس ٸستەۋگە شاقىردى. وسى ماقساتتا دٸني باسقارما مەن وبلىستىق مەشٸتتەر جانىنان اقپارات ورتالىقتارى دا قۇرىلعان. ونلاين قۇرباندىق تۋرالى بٸلگٸسٸ كەلەتٸن ازاماتتار وسى ورتالىقتارعا حابارلاسا الادى.
قازاقستان مۇسىلماندارىنىڭ دٸني باسقارماسى حالىقتى وسىنداي قيىن-قىستاۋ كەزدە پەندەشٸلٸككە سالىنباي, پايدا تابۋ مەن الىپساتارلىققا بارماي, مال باعاسىن قىمباتتاتپاۋعا, حالىقتىڭ جاعدايىن ەسكەرۋگە شاقىرادى. قاساپشىلار دا ٶز قىزمەتٸنە الاتىن اقىسىن قىمباتتاتپاي, جاناشىرلىقپەن ەلگە قىزمەت ەتەر دەپ ٷمٸتتەنەدٸ.
قۇربان شالۋ ٷشٸن وبلىس, قالا ەكٸمدەرٸن, سانيتارلىق-ەپيدەميولوگييالىق باسقارما قىزمەتكەرلەرٸن تەرتٸپ ساقشىلارىمەن بٸرلەسٸپ اتسالىسۋعا ٷندەيدٸ.
