"Sh.Ýálihanov músinin biege aiyrbastaimyn!" Kókshetaýlyq turǵyn áleýmettik jelide osyndai habarlandyrý jasady, dep habarlaidy QazAqparat tilshisi.
Habarlandyrýda kórsetilgendei, jarnama iesi Meiramhan Qoishybaev esimdi turǵyn qazaqtyń uly ǵalymynyń músinine 420 myń teńge nemese bir bie surap otyr.
Jarnamadaǵy telefon arqyly habarlasqanymyzda Meiramhan ózin músinshi, sýretshi retinde tanystyrdy. Onyń sózinshe, músinniń jasalǵanyna 40 jyl bolǵan.
«Bul eskertkishti (Shoqan Ýálihanov biýsti) 1978 jyly dosymyz ekeýimiz jasap, Shoqan Ýálihanov atyndaǵy Kókshetaý memlekettik ýniversitetiniń aldyna ornattyq. Keiin onyń ornyna basqa jańasy ornatylyp, bul eskertkish alynyp tastaldy. Dosymnyń qaitys bolǵanyna biraz jyl ótti. Eskertkish jai tur. Sondyqtan, ony satýdy sheshtim. Bálkim bireýler alyp, tiisti jerine ornatady dep úmittenemin», - deidi Meiramhan Qoishybaev.
Sonymen qatar, músinshiden suraǵanymyzda biiktigi 1 metrden asatyn biýstiń eshqandai qujattarynyń joqtyǵyn anyqtadyq. Osy týraly Aqmola oblystyq tarihi-mádeni murany qorǵaý jáne paidalaný ortalyǵyna habarlasqanymyzda ondaǵylar «Tarihi eskertkishterdi salý jáne ornatý úshin QR Mádeniet jáne sport ministrliginiń arnaiy litsenziiasy bolýy qajet» ekenin aitýda. Al, qalalyq ákimdiktegiler bolsa, atalmysh músindi qala aýmaǵynda ornatylǵan eskertkishter tiziliminde joq dep otyr.
«Qalalyq ákimdik qala aýmaǵyndaǵy ornatylǵan, eskertkishter reestirine tirkelgen eskertkishter úshin jaýapty. Naqtyraq aitqanda qujattardy rásimdeý, jer telimin bólý, aǵymdaǵy jáne kúrdeli jóndeý jumystary. Qoldanystaǵy zańnamaǵa sáikes, qalalyq ákimdik, jeke tulǵadan satatyn taýardy tárkilep ala almaidy, jáne satý-satyp alý operatsiiasyn boldyrmaýǵa quzyry joq. Degenimen atalǵan jaǵdai qala ákimdiginiń nazaryna alyndy», - dep túsindirdi Kókshetaý qalasynyń baspasóz qyzmetinen.
Aita keteiik, habarlandyrý 23 shildede jariialanǵan.
