Ol tsifrlandyrý jónindegi vitse-ministrler sandyq túrlendirýdi damytýmen ainalysý kerek ekenin atap ótti. Bul rette, qarjy ministrligi basshysynyń aitýynsha, sandyq túrlendirý protsesterin avtomattandyrýdan ajyratý qajet.
"Avtomattandyrý men sandyq túrlendirýdiń aiyrmashylyǵyn túsindireiin. Bizge ádistemelik tapsyrmalar berilgende, avtomattandyrýmen ainalystyq. Mysaly, jer qoinaýyn paidalaný litsenziiasyn nemese quqyǵyn berý. Bul quqyq zańnamalyq aktilerde jáne nusqaýlyqtarda kórsetilgen. Jetekshilik etetin salalyq vitse-ministr nemese salalyq departament ony avtomattandyrý kerek dep sanaidy, sodan keiin IT mamandar osy protsesterdi avtomattandyrdy. Biz qoldanystaǵy normativtik-quqyqtyq aktilerdi negizge alyp, biznes-protsesterdi avtomattandyrýmen ainalystyq", - dedi Mýsin.
Sonymen qatar, ministr avtomattandyrý qoldanystaǵy protsesterdi jolǵa qoiý ekenin atap ótti. Sandyq túrlendirý - qoldanystaǵy protsesterdi tolyq qaita qaraý.
"Mysaly, byltyr HQKO-larda halyqtyń kóp ekenin kórdik. Sol jerde jaǵdaidy túzetýge, protsesterdi avtomattandyrýǵa bolatyn edi. Biraq biz sol jerge baryp, bul múmkin emes ekenin túsindik, onlain rejimge kóshirý kerek. Ekinshi deńgeili banktermen birge avtokólik satýdyń onlain-servisin, avtokólikti onlain-tirkeýdi jasadyq. Bul - sandyq túrlendirý.
Sol kezde ETsQ, internet, derekter bazasy jáne biometriia bar ekenin túsindik. Onda kelip júrýdiń ne keregi bar? Ishki ister ministrligi usynys tastap, tez iske asyrdyq. Qazir avtokólikterdiń 36 paiyzy onlain túrde qaita rásimdeledi, halyq HQKO-ǵa barmaidy. Endi kez-kelgen protsesti qaita oilastyrý kerek. Mine, sandyq túrlendirý jónindegi vitse-ministrler árbir protsesti avtomattandyryp qana qoimai, qaita qaraityn bolady", - dep túsindirdi Mýsin.
Sandyq túrlendirýdiń taǵy bir mysaly retinde ministr múgedektikti taǵaiyndaý rásimin qaita qaraýdy atady. Mysaly, buryn adamdar múgedektik taǵaiyndalyp, járdemaqy alý úshin tórt orynǵa barýy kerek edi. Onyń aitýynsha, eńbek jáne halyqty áleýmettik qorǵaý vitse-ministrimen birge bul protsess tolyǵymen qaita qaraldy.
"Adam emhanaǵa bir ret qana barady, meditsina qyzmetkeri bárin derekter bazasyna engizedi, ári qarai bári onlain ótedi, sondai-aq, qarym-qatynas SMS nemese qosymsha arqyly júrgiziledi.
Sandyq túrlendirý - barlyq protsesti qaita qaraý. Qasym-Jomart Kemeluly tsifrlandyrý jónindegi árbir vitse-ministrdiń salaǵa tereń úńilip, túrlendirýin jáne qazirgi ahýaldy sybailas jemqorlyq kórinisterin ózgertýge kómektesetin jańalyqtardy usynýyn da kútedi", - dedi Mýsin.
