Tsifrlyq damý, innovatsiia jáne aeroǵarysh ónerkásibi ministri Baǵdat Mýsin jýrnalisterdiń suraqtaryna jaýap berip jatyr. Nur-Sultan, 11 qarasha 2021 jyl.
11 qarashada jýrnalister suraǵyna jaýap bergen Tsifrlyq damý, innovatsiia jáne aeroǵarysh ónerkásibi ministri Baǵdat Mýsin reseilik "Sbermen memorandýmnyń kúshi joiyldy" degen sybysty rastamady. Ol tek jobany júzege asyrý kezinde qazaqstandyq mamandardyń róli artatynyn jetkizdi, dep habarlaidy Azattyq radiosy.
"Memorandým aiasynda qajetti jumystar júrgizilip jatyr" dedi ministr.
"Tsifrlandyrý jobasy" boiynsha qurylǵan sarapshylar keńesiniń múshesi Muhtar Taijan bir kún buryn Facebook paraqshasynda reseilik "Sberbank Qazaqstandy tsifrlandyrýmen ainalyspaidy, endi onymen tek qazaqstandyq IT mamandar ǵana ainalysady, úkimet ustanymyn túbegeili ózgertti" dep jazǵan edi. Bul qoǵamda Qazaqstan reseilik "Sbermen jasasqan memorandýmnyń kúshin joidy" degen sybystyń taralýyna túrtki bolǵan.
Beisenbi kúni Tsifrlyq damý, innovatsiia jáne aeroǵarysh ónerkásibi ministri Baǵdat Mýsin sarapshylar keńesinde aitylǵan jaittarǵa toqtaldy.
Onyń aitýynsha, tsifrlandyrý boiynsha "úsh másele halyqty narazy etken": 1) tsifrlandyrý jobasyna qazaqstandyq IT mamandardyń az tartylýy; 2) qazaqstandyqtardyń jeke derekteri sheteldik mamandarǵa beriledi degen boljam; 3) Qazaqstannyń tsifrlandyrýy joǵary deńgeide bolsa da, ony basqa platformaǵa aýystyrýdyń ne qajeti bar degen suraq.
Ministrdiń aitýynsha, Qazaqstan memorandýmda kórsetilgendei tsifrlandyrý úshin reseilik Sber platformasyn satyp alady. Reseilik "Sber" tehnologiiamen jabdyqtaýshy kompaniia retinde qazaqstandyq mamandardy platformada jumys isteýge úiretip, ashyq kodpen qamtamasyz etedi. Al qazaqstandyq mamandar osy kodtardy paidalanady, el aýmaǵynda serverlik ortalyqtar qurady. Qazaqstandyqtardyń derekteri osy ortalyqtarda saqtalady. Osylaisha ministr "tsifrlandyrýmen tek qazaqstandyq mamandar ainalysady" dep sendirýge tyrysty.
- Osy plaftormalyq modelge kóshýge jobalap aitqanda 500 mln dollar jumsalady. Qazaqstandyq mamandar osy jobanyń eń mańyzdy bóligimen ainalysady. Sol sebepti barlyq qarajat "Sberge" jumsalady dep aitýǵa bolmaidy. Qomaqty qarajat qazaqstandyq IT kompaniialarǵa jumsalady. Platorfmalyq modelge kóshý boiynsha qajetti infraqurylym, serverlik ortalyq Qazaqstanda qalady. Ol eshqaida ketpeidi, - dedi ministr.
Biyl 3 qyrkúiekte Qazaqstan úkimeti reseilik Sber kompaniialar tobymen Qazaqstannyń tsifrlyq úkimetine arnalǵan platforma qurý jóninde memorandýmǵa qol qoiǵan.
Bul memorandým Qazaqstan qoǵamynda túrli pikir týǵyzdy. Áleýmettik jeli qoldanýshylary, arasynda IT-qaýymdastyq ókilderi de bar, joba eldiń táýelsizdigine qaýip tóndiretinin alǵa tartyp, platformany otandyq nemese batys kompaniialaryna nelikten senip tapsyrmady degen suraq qoiǵan.
Qoǵam kúdigin seiiltý maqsatynda ministrlik buǵan deiin qazaqstandyq IT mamandarynan quralǵan sarapshylar keńesi qurylatynyn, másele olarmen birge talqylanatynyn aitqan. 9 qarashada alǵashqy otyrysy ótken.
