Búgin Májilistegi Úkimet saaǵatynda QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin Sberbankpen aradaǵy memorandýmǵa qatysty túsinik berdi, dep habarlaidy QazAqparat.
Májilis depýtaty Erlan Sairov tsifrlyq platformany qurýǵa bailanysty Reseidiń «Sberbanki» arasyndaǵy qoiylǵan memorandým jurtshylyq ishinde rezonans týǵyzǵanyn eske saldy.
«Siz ótken kúni azamattarmen kezdesip, biraz suraqtardy seiilttińiz, ol – durys. Degenmen jobany iske asyrýǵa qatysty suraqtar áli bitken joq. Biz jobany iske asyrý ádilettilik printsipterine sáikes kelýi kerek dep esepteimiz. Iaǵni tsifrlyq platforma boiynsha naqty kórsetkishteri bar, tiisti tehnikalyq tapsyrma ázirlenip, jobada qazaqstandyq úlesti qamtý joǵary deńgeide bolýy kerek. Qazaqstannyń tsifrlyq platformasyn ázirleýge halyqaralyq ashyq tender jariialanǵany abzal. Onda eldiń tsifrlyq táýelsizdigine, azamattardyń derekterin qorǵaýǵa qatysty barlyq talaptar belgilenýi qajet. Jobany otandyq tsifrlyq indýstriiany damytý men ártaraptandyrýǵa qýatty serpin beretindei etip iske asyrýǵa tiispiz. Osy oraida naqty tehnikalyq tapsyrma bar ma? Jobany júzege asyrýǵa ashyq konkýrs qashan jariialanady?», - dedi surady depýtat Tsifrlyq damý ministrine qarata aitqan sózinde.
Óz kezeginde B. Mýsin bul baǵytta tiisti túsindirý jumystary júrip jatqanyn aitty.
«Naqty aitsaq, memorandýmǵa qol qoiyldy. Ol eshqandai kelisimshart emes. Tehnikalyq negizdeme men tehnikalyq qujattama daiarlaý úshin zertteý jumystaryn júrgizip jatyrmyz. 15 jeltoqsanǵa deiin zertteý aiaqtalǵannan keiin, tehnikalyq qujattamaǵa kóshemiz. Aldaǵy jylǵy 15 aqpanǵa deiin tehnikalyq qujattamany daiyndaimyz. Sol tehnikalyq qujattama negizinde tehnikalyq ári ekonomikalyq negizdeme ázirlenedi. Osy rásimder jasalmai, eshqandai kelisimshart bekitilmeidi. Ekinshiden, platformaǵa toqtalsaq, biz búginge deiin jalpy osy tehnologiialardy, iaǵni elimizde jasalmaǵan platformalardyń arqasynda tsifrlandyrýdy júrgizdik. Biraq sheteldik platformalardy alyp, ózimizdiń qazaqstandyq mamandardyń biliktiligimen qazirgi tsifrlandyrý deńgeiine jettik. Endi ony ary qarai ilgerileti úshin, problemalardy sheshý úshin jańa platformalyq modelge kóshý kerek ekenin aityp jatyrmyz. Sondyqtan bul qadamdar zańǵa sákes júrgiziledi. Osy baǵytta talqylaý júrip jatyr. Osyǵan deiin qol qoiylǵany – ol memorandým. Nelikten biz oǵan qol qoidyq? Óitkeni ashyq kodtardy berýge nietti qazirgi kezde tek sol platforma ǵana bolyp tur. Eger basqa da barlyq tehnologiialary ári biriktirilgen bir platformasy barlar bolsa, sondai-aq bizge ashyq kodtardy berse, ózimiz sol ashyq kodtardyń arqasynda súiemeldeý jumystaryn júrgize alsaq, onda olardy da qarastyratyn bolamyz», - dep túsindirdi Baǵdat Mýsin.
Sonymen qatar depýtat Qazybek Isa tsifrlandyrý boiynsha BUU reitingisinde Qazaqstan jaqsy deńgeide turǵanyn aitty.
«Biz tipti Reseidiń de aldyndamyz. Endeshe, ózimizden keiin turǵan Reseige 19 mln qazaqstandyqtyń málimeti bar elektrondy úkimetti tutastai bere salý Táýelsizdigimizge nuqsan emes pe? «Aq jol» fraktsiiasy bul jaiynda depýtattyq saýal joldady.
Osyǵan deiin memorandýmǵa qol qoiyldy, bizde barlyǵy memorandýmnan bastalady. Halyqtyń qaýiptenip, narazalyq aitqany da osyǵan bailanysty. Ekinshiden, nelikten bul qadamdar ózimizden keiin turǵan Reseimen jasalyp otyr? Aldyńǵy qatarly eldermen nege júrgizilmeidi?», - dep surady Q. Isa.
Bul saýalǵa jaýap retinde Baǵdat Mýsin birinshiden tehnikalyq qujattar daiar bolǵansha eshqandai kelisimshartqa qol qoiylmaitynyn qaitalady.
«Osy kúnge deiin jumystardy atqarý úshin milliardtaǵan somaǵa litsenziialyq baǵdarlamalardy satyp alǵan edik. Biz olardy ózimiz jasaǵan joqpyz. Solardyń bazasynda, negizinde úlken júieni jasaý - bizdiń qazaqstandyqtarǵa tiesili. Platformany jasaý, negizin satyp alý - tek bir ǵana másele. Al ony qurastyrý, qajetti platformany qurý – ol bizdiń qolymyzda. Bul jumysqa tek qazaqstandyq mamandar tartylady jáne bizdiń IT-sektorǵa serpilis beredi. Jańa ideiaǵa, jańa platformaǵa kóshý otandyq mamandar úshin qosymsha tapsyrystar alyp keledi. Atap aitqanda, bizge kim ashyq kodtardy berse, solardy qarastyrýǵa daiynbyz degen saýal jiberdik. Sondyqtan eshkimge de tosqaýyl qoiyp otyrǵan joqpyz», - dedi ministr.
Osy oraida ol «Sberdiń» tehnologiiasy qarastyrylyp jatqanyn, óitkeni olar ashyq kodtardy berýge daiyn ekenin aitty.
«Olardyń tehnologiialyq deńgeiin zerdeleý úshin sarapshylyq keńespen birigip pysyqtaimyz», - dedi Baǵdat Mýsin.
Sóz sońynda ministr atalǵan másele boiynsha Parlament depýtattarynyń jáne sarapshylardyń qatysýymen tyńǵylyqty talqylaýǵa daiyn ekenin aitty.
