Qazaqstannyń burynǵy Qorǵanys ministri Murat Bektanovty tutqynda ustaý merzimi uzartyldy, - dep habarlaidy "Ult aqparat".
Almaty qalasy mamandandyrylǵan aýdanaralyq tergeý soty burynǵy Qorǵanys ministri Murat Bektanovty qamaýda ustaý merzimin taǵy bir aiǵa – 20 maýsymǵa deiin uzartty.
Is áli sotqa kelmegen.
Aita keteiik, Prezident 19 qańtarda Bektanovty synǵa alyp, qyzmetinen bosatqan bolatyn. Memleket basshysy Qasym-Jomart Toqaev ministrdiń Qańtar oqiǵasy tusynda komandirlik qabilet kórsete almaǵanyn synǵa alǵan.
Bir aidan soń, 20 aqpanda Bektanov ustalyp, ýaqytsha ustaý izoliatoryna qamaldy. Bas prokýratýra oǵan qatysty Qylmystyq kodekstiń 452-baby "Biliktiń áreketsizdigi" boiynsha sotqa deiingi tergeýdi bastady.
Osy bapqa sáikes, áskeri jaǵdaida bilikti asyra paidalanǵany úshin múlki tárkilenip, belgili bir laýazymdardy atqarý nemese belgili bir qyzmetpen ainalysý quqyǵynan ómir boiyna aiyrylyp, 7 jyldan 15 jylǵa deiin bas bostandyǵynan aiyrýǵa jazalanýy múmkin.
