QR Tuńǵysh Prezidenti – Elbasy Nursultan Nazarbaev ózine eskertkish ornatý syndy syilyqtardy múldem unatpaidy. Bul týraly Elbasynyń baspasóz hatshysy Aidos Úkibai aitty, dep habarlaidy "Ult aqparat".
«Elbasy bul ideiany jáne osyǵan deiin kóterilgen ózge de bastamalardy qoldaǵan joq. Oǵan eskertkish ornatý, sáýlet nysanynyń ataýyn ózgertýmen bailanysty mundai «syilyqtar», ásirese bul «syilyqtar» jergilikti sheneýnikter uiymdastyrsa múldem unamaidy. Nursultan Ábishuly mundai kóńil aýdarýlardyń qajet emestigin san márte málimdegen bolatyn. Keide keibir adamdar ádeii aqparattyq shý týdyrǵysy keletindei áser qaldyrady. Tarihta ol óz atyn jańa jobaǵa berýge kelisken bir ǵana jaǵdai boldy. Bul - ýniversitet pen ziiatkerlik mektepter», - dedi Elbasynyń baspasóz hatshysy.
Sonymen qatar ol Astana kúni, Tuńǵysh Prezident kúni jáne ózge de ataýly datalar eń aldymen adamdar, elimizdiń azamattary úshin meiram ekendigine basa nazar aýdartty.
«Biyl Qazaqstan Táýelsizdiginiń 30 jyldyq mereitoiyn atap ótedi jáne de barlyǵymyz úshin basty syilyq eskertkishter nemese ataý ózgertý emes, halqymyzdyń birligin, turaqtylyǵyn, ál-aýqaty men gúldenýin saqtaýǵa baǵyttalǵan júieli is-sharalardy sapaly júzege asyrý bolýy tiis. Nursultan Nazarbaev atap ótkendei, onyń eńbeginiń eń úzdik eskertkishi – bul jarqyn bolashaqqa umtylatyn, ilgeri oilai biletin jastar, bul zamanaýi elordasymen, óz Otanyn shynaiy súietin azamattarymen gúldenip kele jatqan Qazaqstan», - dedi Aidos Úkibai.
Esterińizge sala ketsek, TÚRIKSOI-dyń Bas hatshysy Bilal Chakydji «Túrkistan – Túrki áleminiń rýhani astanasy: áriptestik integratsiiasy men keleshegi» atty halyqaralyq onlain-konferentsiia barysynda Túrkistanda Elbasy N.Nazarbaevqa eskertkish ornatý týraly bastama jasaǵan edi.
