Shikizattyq emes taýardyń eksportyn ulǵaitýdan munaiǵa jatpaityn eksport ósedi. Bul týraly Úkimet otyrysynda QR Ulttyq bank tóraǵasy Erbolat Dosaev aitty, dep habarlaidy QazAqparat HAA.
«Qazaqstannyń 2025 jylǵa deiingi ulttyq damý josparynyń maqsattaryna sáikes, shikizatqa jatpaityn eksportty ulǵaitý jáne importqa táýeldilikti tómendetý boljamdy kezeń ishinde tólem balansynyń aǵymdaǵy shotynyń tapshylyǵyn qysqartýǵa ári 2026 jyly ishki jalpy ónimge (+) 1,9%-ǵa deiin profitsit aimaǵyna aýysýǵa yqpal etetin bolady. Taýarlar eksportynyń 2026 jyly 80 mlrd AQSh dollaryna deiin kezeń-kezeńmen ósýi kútilýde. Munai eksportynyń ósýi 2023 jyldyń ortasynan bastap munai óndirý kóleminiń ulǵaiýymen qamtamasyz etiletin bolady», - dedi Dosaev.
Onyń aitýynsha, álemdik suranystyń birtindep qalpyna kelýi, metall baǵasynyń boljamdy ósýi jáne shikizatqa jatpaityn eksportty ulǵaitý saldarynan munaiǵa jatpaityn eksport ósedi.
«Taýarlar importy halyq pen biznestiń tólem jasaýǵa qabiletti suranysynyń ósýine, sondai-aq iri investitsiialyq jobalardy iske asyrýǵa bailanysty qalypty deńgeidi ustap otyrady. Úkimet, Ulttyq bank jáne Qarjy naryǵyn retteý jáne damytý agenttigi arasyndaǵy 2021-2023 jyldarǵa arnalǵan úshjaqty kelisim aiasynda iske asyrylatyn importqa táýeldilikti azaitý jónindegi sharalar 2026 jyly importtyń 43,4 mlrd AQSh dollaryna deiin qalypty ósýine yqpal etetin bolady», - dedi UB basshysy.
