2026 jyly munai óndirý 107,4 million tonnaǵa deiin ulǵaiady. Bul týraly Úkimet otyrysynda 2022-2026 jyldarǵa arnalǵan áleýmettik-ekonomikalyq damýy boljamynyń jobasyn tanystyrý kezinde Ulttyq ekonomika ministri Áset Erǵaliev málim etti, dep habarlaidy QazAqparat.
«2022 jyly munai óndirý 87,9 million tonnany qurap, 2026 jyly 107,4 million tonnaǵa deiin ulǵaiady. 2022 jyly taýarlar eksporty 60,1 milliard AQSh dollary deńgeiinde boljanyp otyr jáne 2026 jylǵa qarai 79,8 milliard AQSh dollaryna deiin ulǵaiady. Taýarlar importy 2022 jyly 40,8 milliard AQSh dollarynan 2026 jyly 43,4 milliard AQSh dollaryna deiin ulǵaiady», - dedi Á. Erǵaliev.
Onyń aitýynsha, saýda balansynyń saldosy 19,3 milliard AQSh dollarynan 36,4 milliard AQSh dollaryna deiin ósedi.
Osy makroekonomikalyq kórsetkishterdi eskere otyryp, biýdjettik parametrlerdiń kelesi boljamy ázirlendi. Respýblikalyq biýdjettiń kiristeri 2022 jyly boljamdar boiynsha 9,2 trillion teńgeni, 2023 jyly - 9,7 trillion teńgeni, 2024 jyly - 10,4 trillion teńgeni quraidy.
«Kepildendirilgen transfertti 2022 jyly - 2,4 trillion teńge, 2023 jyly - 2,2 trillion teńge jáne 2024 jyly - 2 trillion teńge mólsherinde aiqyndap, áleýmettik mindettemelerdi qarjylandyrýǵa baǵyttaý usynylyp otyr», - dedi ministr.
