Qańtarda elimizde munai ónimderin óńdeý kólemi 90,5 paiyz oryndaldy. Bul týraly búgin Úkimet otyrysynda QR Energetika ministri Nurlan Noǵaev aitty, dep habarlaidy QazAqparat.
«Qańtar aiynyń qorytyndysy boiynsha 1 mln tonna munai ónimderi óndirildi. Bul kórsetkish qańtar aiynyń josparyna 90,5 paiyzdy quraidy. Onyń ishinde avtobenzin boiynsha kórsetkish 410 myń tonnaǵa jetti. Iaǵni, jospardyń 91,2 paiyzyn qurady. Óndirilgen dizel otynynyń kólemi - 326 myń tonna. Jospar 77 paiyzǵa oryndaldy. Áýe otyny boiynsha kórsetkish 35 myń tonnaǵa teń. Jospar 91,4 paiyz oryndalyp otyr», - dedi Nurlan Noǵaev.
Ministr atalǵan kórsetkishterdiń tómendeý sebepterine de toqtaldy.
«Osy jyldyń qańtarynda Atyraý munai óńdeý zaýytynda elektr energiiasyn jetkizýde irkilis, aqaý paida boldy. Bul jaǵdai katalikalyq kreking jáne reforming qondyrǵylarynyń tolyqtai jáne ishinara isten shyǵýyna alyp keldi. Bul rette munai óńdeý jáne munai ónimderin óndirý kóleminiń tómendegenine qaramastan, ishki naryqtaǵy munai ónimderiniń qory turaqty deńgeide. 16 aqpandaǵy jaǵdai boiynsha ishki naryqta 24 kúnge jetetin 251 myń tonna benzin, 38 kúnge jetetin 357 myń dizel otyny qory bar», - dedi ol.
Onyń dereginshe, qańtarda 242myń tonna mazýt óndirilip, jospar 116 paiyzǵa oryndaldy.
