QR Básekelestikti qorǵaý jáne damytý agenttigi «negizgi qýattarǵa» qol jetkizý múmkindigin shekteý arqyly shaǵyn jáne orta biznestiń tynysyn taryltyp kelgen salalardy atady, dep habarlaidy QazAqparat.
«Ekonomikalyq ósimnen negizgi paidany qarjy-oligarhiialyq toptar alyp keldi. Qalyptasqan oligopoliialar erkin naryqtyń damýyn aitarlyqtai shektep, eldiń básekege qabilettiligin tómendetti. Bul jaǵdai negizinen shaǵyn jáne orta biznestiń «negizgi qýattarǵa» qol jetkizý múmkindigin shektedi», - dep jazylǵan agenttiktiń baspasóz qyzmeti taratqan málimette.
2021 jyldyń 30 jeltoqsanynda básekelestikti damytý jónindegi zańǵa qol qoiyldy. Agenttik mamandary atalmysh zań normalary Memleket basshysynyń Qazaqstan ekonomikasyn odan ári memleket ieliginen shyǵarý jáne eldiń negizgi naryqtaryna jańa oiynshylardyń kirýine jol ashý týraly tapsyrmalaryn oryndaýǵa negiz bolyp otyrǵanyn aitady.
«Zańnyń negizgi baǵyttarynyń biri – shaǵyn jáne orta biznestiń «negizgi qýatqa», iaǵni infraqurylymǵa nemese obektilerge qol jetkizýin qamtamasyz etý. Onsyz tiisti naryqta qandai da bir qyzmet túrin oryndaý múmkin emes», - delingen málimette.
Agenttik ókilderiniń «negizgi qýat» dep otyrǵandary – magistraldyq temirjol jelisi, bailanysqa arnalǵan kabel jelisi, bastapqy metall shikizaty, óńdeýge arnalǵan munai, teńiz porty, dári-dármek óndirýge arnalǵan sýbstantsiialar, óndiris tehnologiialary siiaqty memlekettik organdar arqyly retteletin resýrstar.
Básekelestikti qorǵaý jáne damytý agenttiginiń túsindirmesine qaraǵanda, qoldanystaǵy júie ásirese shaǵyn jáne orta biznes nysandarynyń «negizgi qýattarǵa» qol jetkizýin shekteý arqyly olardy básekege qabiletsiz etip kelgen.
Munyń mysaly retinde oblystar arasyndaǵy shekaralarda óńirlik stantsiialarmen jáne elektr jelilerimen úlesi bir kompaniialardyń elektr energiiasy naryǵynda ústemdik etip otyrǵanyn keltiredi.
«Osyǵan uqsas jaǵdai munai ónimderi naryǵynda da bar. Oligopoliialyq naryq bolǵandyqtan munda taýarlardy satyp alý-satý mámileleri tikelei sharttar boiynsha jasalady. Sonyń kesirinen kólemderdi bólý, kontragentterdi tańdaý úderisteri aiqyn ótpeidi de, jasyryn baǵa belgileý, baǵaǵa monopoliianyń ústemdik etýi siiaqty keri áserler qalyptasady. Mundai áserler básekelestik pen kásipkerliktiń damýyna kedergi keltiredi», - dep túsindiredi agenttik sarapshylary.
Byltyr jyl aiaǵynda qabyldanǵan zań osy olqylyqtardyń kúshin joiýǵa baǵyttalǵan.
«Zańdy iske asyrý úshin «negizgi qýatqa» teń dárejede qol jetkizý qaǵidalary ázirlenedi. Iaǵni qol jetkizý sharttary men merzimderi, «negizgi qýatty» usynýdan bas tartý negizderi, ótinimderdi qaraý tártibi siiaqty erejeler aiqyndalady.
Qazirgi ýaqytta Básekelestikti qorǵaý jáne damytý agenttigi munai jáne munai ónimderi, taýarlyq gaz, elektr energiiasy, kólik jáne bailanys, qarjy naryǵy siiaqty monopoliia jailaǵan naryqtardy monopoliiasyzdandyrý turǵysynan keshendi taldaý júrgizýge kiristi. Taldaý monopoliialyq toptar qyzmetiniń aralas taýar naryqtaryna áserin, olardyń ekonomikalyq tiimdiligin jáne monopoliialyq shyǵyndardyń bolýyn baǵalaýǵa múmkindik beredi», - dep jazady agenttiktiń baspasóz qyzmeti.
