Mamyrda etalondyq Brent surypty munaidyń bir barreli 69,32 AQSh dollaryna nemese 3,1%-ǵa qymbattaǵan, dep habarlaidy QazAqparat.
Bul týraly Ulttyq bank tóraǵasynyń orynbasary Áliia Moldabekova aitty.
«Mamyrda etalondyq Brent surypty munaidyń baǵasy bir barrel úshin 69,32 AQSh dollaryna deiin, iaǵni 3,1%-ǵa ósti. Halyqty vaktsinalaýdyń jalǵasýy jáne karantin shekteýleriniń jeńildeýi AQSh ekonomikasyn jaqsartyp, munai baǵasy 70 dollarǵa deiin jetti. «OPEK+» uiymy munai óndirý jónindegi qoldanystaǵy kelisim uzartylǵannan keiin qosymsha oń kórsetkishter baiqalady», - dedi Áliia Moldabekova.
Ulttyq bank ókiliniń aitýynsha, sonyń áserinen mamyrda teńge baǵamy 428,71 teńgege deiin nemese 0,1%-ǵa nyǵaiǵan.
«Salyq aptasy men beirezidentter investitsiialarynyń ulǵaiýy teńge úshin qosymsha oń faktorlar boldy. Eksporttaýshylar salyq kezeńinde shamamen 290 mln AQSh dollaryn birjada konvertatsiialady. Al beirezidentterdiń Qazaqstannyń memlekettik baǵaly qaǵazdaryna kelýi shamamen 100 mlrd teńgeni qurady. Barlyq atalǵan oń faktorlar aiasynda teńgeniń shamaly nyǵaiýy dividendter tóleý úshin shetel valiýtasyna suranystyń artýyna bailanysty boldy», - deidi Ulttyq bank ókili.
Sondai-aq, ol valiýta naryǵyndaǵy jaǵdai teńgerimdi bolǵandyqtan Ulttyq banktiń interventsiia júrgizýine qajettilik bolmaǵanyn aitady.
«Biýdjetke transfertter aýdarý úshin valiýta naryǵynda 553 mln AQSh dollary konvertatsiialandy. Kvazimemlekettik sektordyń satý kólemi shamamen 340 mln AQSh dollaryna jetti. Maýsymda teńge baǵamynyń nyǵaiýy jalǵasyp otyr. Aidyń basynan bastap munaidyń eń joǵary baǵalary aiasynda valiýta 428,71-den 426,70 aralyǵynda nemese 0,5%-ǵa nyǵaidy», - deidi Áliia Moldabekova.
