Sońǵy 4 jylda munai-gaz himiia ónimder óndirisiniń kólemi tórt ese ulǵaidy. Bul týraly búgin Úkimet otyrysynda QR Energetika ministri Nurlan Noǵaev aitty, dep habarlaidy "Ult aqparat".
«Qazirgi ýaqytta Qazaqstanda munai-gaz sektoryn shikizattyq baǵyttan qosylǵan quny joǵary ónim shyǵarýǵa, iaǵni joǵary bólinistegi munai-gaz himiia ónerkásibin damytýǵa qaita baǵdarlaý jónindegi jumys júrgizilýde. Prezidenttiń 2020 jylǵy 1 qyrkúiektegi Qazaqstan halqyna Joldaýynda batys óńirlerdi munai-himiia keshenderiniń qurylysyna investitsiialar tartý ortalyqtary retinde qalyptastyrý, sondai-aq munai-himiia men joǵary bólinisti gaz óńdeýdi damytý mindetin qoidy», - dedi óńdeý ónerkásibin damytý jaiynda baiandaǵan ministr.
Onyń atap ótýinshe, jańa kásiporyndardyń iske qosylýyna jáne hosh iisti kómirsýtekter, mailar men polipropilen óndiretin zaýyttardyń ónim shyǵarý kóleminiń artýyna bailanysty jyl saiyn munai-gaz himiia ónimderi óndirisiniń ulǵaiýy baiqalady. Máselen, 2016-2020 jyldary shyǵarylǵan ónim kólemi 4 ese ósip, 360 myń tonnany qurady.
«Búginde elimizde jalpy qýaty shamamen 870 myń tonnany quraityn mailaý materialdaryn, polipropilen, metil-tret-býtil efirin, benzol men paraksilol óndiretin 5 zaýyt jumys isteidi», - dedi Nurlan Noǵaev.
