QR Indýstriia jáne infraqurylymdyq damý ministrligi qurylys jáne turǵyn úi-kommýnaldyq sharýashylyq isteri komiteti tóraǵasynyń orynbasary Erkebulan Daýylbaev kóppáterli turǵyn úidi basqarýdyń jańa formalaryna kóshýdiń artyqshylyqtaryn aityp berdi, dep habarlaidy QazAqparat.
«Múlik ieleriniń birlestikterin qurýdyń artyqshylyqtaryn atap ótsek: MIB bir kóppáterli úi turǵyndarynyń ózinen turady; MIB tóraǵasy páter, turǵyn emes úi-jailarynyń menshik ieleri arasynan ǵana sailanady; MIB aǵymdaǵy shot jáne kúrdeli jóndeýge arnalǵan jinaq shottaryn ashady; shottardaǵy aqsha qozǵalysyna monitoringti MIB tóraǵasy jáne úi keńesi júzege asyrady; qyzmet kórsetý sapasyn baqylaýdy MIB tóraǵasy qadaǵalaidy; servistik sýbektilerdiń qyzmetteri ai saiyn oryndalǵan jumystar aktisi negizinde qabyldanady jáne aqy tólenedi», - dedi E. Daýylbaev Ortalyq kommýnikatsiialar qyzmetinde ótken baspasóz máslihatynda.
Sonymen birge, MIB tóraǵasy ai saiyn turǵyndarǵa atqarylǵan jumystar týraly esep beredi. Jinaq shotta kúrdeli jóndeýge qajetti qarajattyń 50% jinalǵan jaǵdaida ekinshi deńgeili bankterden kúrdeli jóndeý júrgizýge tómen paiyzben qaryz alý múmkindigi bar.
«Kondominiým nysany tirkelmegen jaǵdaida, jergilikti biýdjet qarajaty esebinen jumys istep turǵan kóppáterli turǵyn úilerge memlekettik tehnikalyq tekserý júrgizý jáne kóppáterli turǵyn úidiń astynda ornalasqan jer ýchaskesine zańnamada kózdelgen qujattardy daiyndaý úshin jergilikti atqarýshy organdarǵa júginýge quqyǵy bar», - deidi spiker.
Qazirgi ýaqytta «Turǵyn úi kommýnaldyq-sharýashylyǵyn jańǵyrtý men damytýdyń qazaqstandyq ortalyǵy» AQ tiesili JKH.KZ (zhkh.kz) saitynda basqarýdyń jańa nysanyna kóshý boiynsha barlyq aqparattyq materialdar ornalastyrylǵan.
Basqarýdyń jańa formalaryn qurý boiynsha azamattardan kelip túsetin ótinishterdiń úlken kólemin eskere otyryp, Telegram-bot platformasy iske qosylǵan. Sonymen birge, suraqtardy Suraqtar.kz platformasyna da joldaýǵa bolady.
Aita keteiik, 2020 jyldyń basynan bastap «Keibir zańnamalyq aktilerge turǵyn úi-kommýnaldyq sharýashylyq máseleleri boiynsha ózgerister men tolyqtyrýlar engizý týraly» QR Zańy kúshine endi. Biylǵy 22 aqpandaǵy jaǵdai boiynsha kóppáterli turǵyn úidi basqarý boiynsha 1 735 uiym qurylǵan.
Basqarýdyń eski formalary 2022 jyldyń 1 shildesine deiin óz qyzmetin jalǵastyrady. Osy merzim aiaqtalǵan soń Qazaqstan Respýblikasynyń zańnamasynda belgilengen tártippen joiý rásimin júrgizýi tiis.
