"Disnei" kompaniiasy jańadan shyǵarǵan "Mýlan" filminde Qytaiǵa alǵys aitqany úshin áleýmettik jeli qoldanýshylarynyń synyna ushyrady. Qytaidyń batysyndaǵy Shyńjańda millionǵa jýyq túrkitildi baiyrǵy halyq ókilin (negizinen uiǵyr, qazaq, qyrǵyz t.b) erkinen tys lagerlerge qamaǵany úshin Pekin jii synalyp keledi.
Áleýmettik jeli qoldanýshylary filmniń sońyndaǵy titrlarǵa nazar aýdarǵan. Onda film avtorlary úkimet qurylymdaryna, onyń ishinde Shyńjańnyń arnaiy qyzmetine alǵys aitqan. "Disnei" alǵyspen atap ótken mekemeler arasynda Týrfan qalalyq okrýgynyń qoǵam qaýipsizdigi basqarmasy da bar. Britandyq BBC saitynyń jazýynsha, bul vedomstvo qaita tárbieleý lagerleriniń jumysyn baqylaidy. Kóptegen kýágerler men jurtqa jariialanyp ketken qupiia málimetterge sáikes, bul lagerlerde adamdardy azaptaǵan, erkinen tys ideologiialyq úgit-nasihat júrgizgen.
"Disnei" ókilderi ázirge túsinikteme bermedi. Qytai biligi buǵan deiin Shyńjańdaǵy lagerler memlekettiń qaýipsizdigin nyǵaitý úshin qajet dep málimdegen bolatyn.
"Mýlan" filmi osyǵan deiin de synǵa ushyraǵan. Oǵan túsken qytailyq aktrisa Liý Ifei Gonkongtegi demokratiialyq sherýlerdi kúshpen basqan politseilerdiń áreketin jaqtap shyqqannan keiin keibir Aziia elderinde filmge boikot jariialaýdy usynǵan.
2020 jyly shyqqan negizgi filmderdiń biri retinde atalǵan "Mýlan" filmin "Disnei" 20 jyl buryn mýltfilm retinde shyǵarǵan. Ol qartaiǵan ákesiniń ornyna áskerge attanǵan Hýa Mýlan esimdi qyz týraly qytailyq ańyzǵa súienip jasalǵan. Ony prokatqa shyǵarý merzimi koronavirýs indetine bailanysty birneshe ret shegerildi. Premerasy 9 naýryzda Gollivýdta ótken.
