Áleýmettik osal sanattaǵy balalarǵa kómek kórsetý qaǵidalaryna ózgerister engizildi. Bul jaiynda óziniń áleýmettik jelidegi paraqshasynda Bilim jáne ǵylym ministri Ashat Aimaǵambetov habarlady.
«Jalpyǵa mindetti bilim berý» qorynyń aiasynda Áleýmettik osal sanattaǵy balalarǵa kómek kórsetý qaǵidalaryna ózgerister engizýge bastamashylyq jasadyq.
Bul ózgerister ne beredi?
Qazirgi kúni «Jalpyǵa birdei bilim berý» qory halyqtyń áleýmettik osal toptaryna kiim-keshek, aiaq kiim, oqý quraldarymen qamtamasyz etý arqyly kómek kórsetedi. Endi bul kómekti aqshaǵa ainaldyryp, ata-ananyń shotyna aýdarý usynylyp otyr. Iaǵni ata-analar balalaryn mektepke daiyndaý úshin eń qajetti zattardy ózderi satyp ala alady. Mundai sheshimdi qoldaǵandar da, oǵan qarsy shyqqandar da kóp ekenin jasyrmaimyn.
Biz áleýmettik qyzmetter portalynyń iske qosylǵanyn birneshe jyl kúttik. Bul júie arqyly qarajattyń maqsatty jumsalýyn baqylaýǵa bolady. Sondai-aq ata-analar osy marketpleisten balaǵa qajetti zattardy ǵana satyp alyp, ony elektrondy aqshamen tólei alady. Odan bólek biz tranzaktsiialardy baqylaýda ustai alamyz.
Alaida isine adal emes basshylardyń muqtaj jandarǵa ólshemi úlken nemese kishi, odan qalsa sapasy óte nashar kiim-keshek satyp alǵany siiaqty faktiler bar. Mundai jaǵdailar bizdi áleýmettik qyzmetter portaly iske qosylǵanyn kútpei-aq, kómekti aqshaǵa ainaldyrýǵa mindetteidi» - dep jazdy ol.
Bul sheshimge qarsy shyqqandardyń aitýynsha, ata-analardyń keibiri bólingen qarajatty basqa qajettilikterge jumsaýy múmkin. Biraq qazirgi júie arqyly keibir azamattar alǵan kiimderin nemese ózge de kerek-jaraqtaryn qaita satyp, qarajatty basqa maqsattarǵa jumsaýy múmkin.
«Aitpaqshy, «jalpyǵa birdei bilim berý» qorynyń jumysyn uiymdastyrý jáne kómek kólemin belgileý ákimdikterdiń quzyrynda jáne olardyń esebine qarai kómek mólsheri ózgerip otyrady (15 myńnan 41 myń teńgege deiin).
Endi eń tómengi kúnkóris deńgeiinen tómen emes kómektiń mólsherin belgileý usynylyp otyr.
«Jalpyǵa mindetti bilim berý» qory aiasynda otbasy AÁK alatyn balalar, eger otbasy AÁK almasa, biraq jan basyna shaqqandaǵy tabysy kúnkóris deńgeiinen tómen bolsa, jetim balalar men ata-anasynyń qamqorlyǵynsyz qalǵan balalar, tótenshe jaǵdaiǵa tap bolǵan otbasynan shyqqan balalar jáne ár mektepte alqaly organnyń sheshimi boiynsha aiqyndalatyn basqa da sanattar materialdyq kómek alady» - dep túiindedi ministr.
