Sybailas jemqorlyqqa qarsy is-qimyl agenttiginiń Preventsiia departamentiniń basshysy Anar Jarovanyń aitýynsha, atalmysh komissiia quramyna qoǵam ókilderin engizý tártibi qoldanysta bar. Dese de, mindetti emes osy normany jergilikti ákimdikter oryndamai otyr, dep habarlaidy QazAqparat.
«Turǵyn úidi bólý kezinde ashyqtyqtyń bolmaýy da másele týyndatady. Páter bólý isin ákimdikterdiń turǵyn úi komissiiasy júrgizedi. Alaida olardyń quramynda is júzinde qoǵam ókilderi joq. Mindetti bolmasa da, olardyń músheliginde keminde 3 qoǵam ókili bolýy kerektigi týraly norma ádette saqtalmaidy. Qurylatyn turǵyn úi komissiiasynyń quramyna memlekettik jáne jergilikti atqarýshy organdardyń qyzmetkerleri ǵana kiredi», - dedi Anar Jarova agenttikte ótken baspasóz máslihatynda.
Osyǵan bailanysty, olarǵa qoǵam ókilderin páter bólinisine qatystyrý týraly normany engize otyryp, turǵyn úi komissiialary týraly úlgilik erejeni qaita qaraý talap etiledi.
«Budan basqa, qabyldanatyn sheshimderdiń ashyqtyǵyn qamtamasyz etý maqsatynda onlain transliatsiiamen turǵyn úi komissiiasy otyrystaryn mindetti túrde aýdio, beine tirkeý qajet. Sondai-aq, taldaý barysynda páterlerdi qabattarǵa bólýge bailanysty sybailas jemqorlyq táýekelderi anyqtaldy. Bul másele normativtik túrde rettelmegen. Bul ákimdik qyzmetkerlerine óz qalaýy boiynsha sheshim qabyldaýǵa jaǵdai jasap, belgili bir syiaqy úshin «suranysqa ie qabattardy» bólýdiń sybailas jemqorlyq táýekelin týyndatady. Bul jerde sheshim adam faktorynyń aralasýynsyz páterlerdi qabattarǵa bólý protsesi avtomattandyrylýy múmkin. Bul turǵyn úidi bólý kezinde ashyqtyq pen aiqyndylyqty qamtamasyz etedi», - deidi ol.
Aita ketsek, buǵan deiin Anar Jarova memleketten beriletin turǵyn úi kezegi boiynsha kezdesken zańbuzýshylyqtardy ataǵan bolatyn.
