24 qazan kúni QR Ulttyq sport qaýymdastyǵy quramyndaǵy respýblikalyq «Kókpar» jáne «Aýdaryspaq» federatsiialarynyń basshylyq quramyna ózgerister endi.
Quryltaishylardyń jalpy jinalysynyń hattamasyna sáikes, respýblikalyq «Kókpar» federatsiiasynyń prezidenti bolyp Dildábekov Muhtarhan Qobylanbekuly, al respýblikalyq «Aýdaryspaq» federatsiiasynyń prezidenti bolyp Qobylandin Daniiar Jańabaiuly taǵaiyndaldy.
Dańqty boksshy Muhtarhan Dildábekov esimi sportsúier qaýymǵa jaqsy tanys. Biraq, eki Olimpiada oiyndarynda baq synaǵan, Sidnei Olimpiadasynyń kúmis júldegeri, HII Aziialyq oiyndarynyń jeńimpazy, HIV Aziialyq oiyndarynyń kúmis júldegeri, Álem chempionatynyń kúmis júldegeri atanǵan ataqty boksshynyń úlken sportqa deiin dodabuzar kókparshy bolǵanyn ekiniń biri bile bermeidi.
Tanystyryp ótelik, Muhtarhan Dildábekov 1976 jyly Túrkistan oblysy Maqtaral aýdany, Abai aýylynda dúniege kelgen. Qazaqstan Respýblikasynyń eńbek sińirgen sport sheberi. Bilimi joǵary. M.Áýezov atyndaǵy Ońtústik Qazaqstan memlekettik ýniversiteti, Q.A.Iasaýi atyndaǵy Halyqaralyq qazaq -túrik ýniversitetin támamdaǵan. «Parasat» ordeniniń iegeri, Ońtústik Qazaqstan oblysynyń qurmetti azamaty.
Boks qolǵabyn shegege ilgen 2006 jyldan Muhtarhan Dildábekov Shymkent qalasynyń №5 bokstan olimpiada rezerviniń mamandyrylǵan balalar men jasóspirimder sport mektebiniń direktory, 2008 jyldan osy ýaqytqa deiin «Ońtústik Qazaqstan oblysynyń bokstan olimpiada rezervin daiyndaityn balalar men jasóspirimderdiń mamandyrylǵan sport mektebiniń» direktory qyzmetterin atqaryp keldi.
Alaida, at jalyn tartyp mingennen kókparqumar bolǵan Muhtarhan Dildábekov osy jyldar aralyǵynda ońtústik óńirde jii uiymdastyrylatyn jappai kókpardyń dodasynan da alys ketken emes. Sondyqtan bolar, ataqty boksshynyń kókparshylyǵy týraly kezinde buqaralyq aqparat quraldarynda kólemdi maqalalar men suhbattar az jariialanǵan joq.
Mine, boks jankúierleri men kókpar jankúierlerine aty máshhúr bolyp kelgen Muhtarhan Dildabekov endi Respýblikalyq kókpar federatsiiasynyń prezidenti bolyp taǵaiyndaldy. Judyryǵy gúrzidei Muhtarhan Dildábekov sharshy alańda uzaq jyl atoi salyp, qazaq ultynyń mereiin ósirdi. Endi elimizdiń kókpar tizginin qolǵa alǵan Muhtarhanǵa ulttyq ónerimizdiń bedelin arttyryp, komandalyq kókpar oiynyn álemdik deńgeige kóteredi degen senim artylyp otyr. Buǵan deiin ózi qadam basqan salasynda tabandylyq tanytyp kelgen Muhtarhan Dildábekov el seniminiń údesinen shyǵa bilgen azamattyń biri.
Al, respýblikalyq «Aýdaryspaq» federatsiiasynyń prezidenti bolyp taǵaiyndalǵan Qobylandin Daniiar Jańabaiuly jaily maǵlumat tómendegidei.
Daniiar Qobylandin 1984 jyly Almaty qalasynda dúniege kelgen. Bilimi joǵary. L. Gýmilev atyndaǵy Eýraziia ulttyq ýniversitetiniń, QR Prezidenti janyndaǵy Memlekettik basqarý akademiiasynyń túlegi. Eńbek jolyn Aqtóbe oblysy prokýratýrasynan bastaǵan. QR Kóliktik baqylaý komitetinde, QR Prezident ákimshiliginde, Almaty qalasy ákimdiginde qyzmet etken. Qazirgi kezde jeke kásipker.
Tólegen JÁKITAI
