QR Syrtqy ister ministri Muhtar Tileýberdi osy jyldyń kókteminde Qazaqstan men Resei shekarasynda oryn alǵan júk kólikteriniń keptelisine qatysty pikir bildirdi, dep habarlaidy QazAqparat.
Elordada Resei Syrtqy ister ministri Sergei Lavrovpen kezdesýden keiingi baspasóz máslihaty barysynda Muhtar Tileýberdi mundai problemanyń bar ekendigin jasyrmady. Onyń aitýynsha, bul másele reseilik tarappen talqylanǵan.
«Degenmen, ol maýsymdyq sipatqa ie. Jalpy, Qazaqstan men Resei shekarasynda - 51, onyń ishinde 30 avtomobil, 20 temirjol jáne 1 ózen arqyly ótetin pýnkt bar. Bul, negizinen Ortalyq Aziiadan Resei baǵytynda jemis-jidekter men kókónister tasymaly bolatyn kóktem jáne jaz ailarynda oryn alyp jatady», - dedi ministr.
Onyń atap ótýinshe, júk tasymaly artqan kezde mundai qiyndyqtardyń oryn alatyndyǵy bar.
«Buǵan qosa, ótkizý pýnktteriniń ótkizý múmkindikteri de ártúrli. Al tasymaldaýshylar jyldam jetý úshin baǵdardy ózderi tańdaidy. Sondyqtan belgili bir pýnktte keptelis oryn alyp jatady. Bul másele 7 qarashada Ombyda ótetin Óńiraralyq yntymaqtastyq forýmynda qosymsha talqylanatyn bolady», - dedi ol.
Sonymen qatar BAQ ókilderi Muhtar Tileýberdiden «Qazaqstandyq taýarlardyń reseilik naryqta túrli tosqaýylǵa ushyraýy talqylandy ma?» degen suraq qoidy.
«Iá, bul másele talqylandy. Ony Eýraziialyq ekonomikalyq odaq aiasynda, erkin saýda erejelerine sáikes sheshý qajet degen ortaq ustanymymyz bar. Bul másele de 15 qazan kúni elordamyzda – Nur-Sultan qalasynda ótetin Qazaqstan-Resei Úkimetaralyq keńesiniń otyrysynda talqylanatynyn kútip otyrmyz», - dep jaýap berdi ministr.
