Elbasy Nursultan Nazarbaevtyń tapsyrmasymen Damaskide salynǵan Ál-Farabi ortalyǵy 2020 jyldyń 21 qańtarynda saltanatty túrde ashylady. Bul týraly Ál-Farabidiń 1150 jyldyq mereitoiyn daiyndaý jáne ótkizý jónindegi memlekettik komissiia otyrysynda QR Syrtqy ister ministri Muhtar Tileýberdi aitty, dep habarlaidy QazAqparat.
«QR Syrtqy ister ministrligi Ábý Nasyr Ál-Farabidiń 1150 jyldyq mereitoiyn daiyndaý jáne ótkizý jónindegi jalpy respýblikalyq jospar jobada kózdelgen is-sharalardy júzege asyrýǵa daiyn. 2020-2021 jyldary UNESCO qatysýmen atap ótiletin ataýly mereitoi kúnderiniń tizbesine Ál-Farabidiń mereitoiyn engizý jóninde jumys júrgizilýde. Bul jónindegi sheshim osy 12-27 qarasha aralyǵynda ótetin UNESCO bas konferentsiiasynda qabyldanady dep kútilýde», - dedi ministr.
Onyń aitýynsha, «Ál-Farabi izimen» atty halyqaralyq ekspeditsiia 2020 jyldyń qańtarynda Otyrardan bastalady.
QR SIM Ál-Farabi atyndaǵy Qazaq ulttyq ýniversiteti janyndaǵy Ál-Farabi ǵylymi-zertteý ortalyǵymen aqyldasa otyryp, qazaqstandyq farabitanýshy ǵalymdardyń qatysýymen qasietti Túrkistanda ǵylymi-praktikalyq konferentsiia ótkizedi. Odan keiin «Ál-Farabi izimen» ekspeditsiiasy Ózbekstanda - Tashkent, Samarqan, Buhara shaharlarynda bolyp, Túrikmenstanda ejelgi Mervtiń arheologiialyq jáne sáýlet eskertkishteri keshenin aralap, Iranda - Nishapýr, Rei, Hamadan kóne qalalarǵa ziiarat jasaidy. Tashkent, Ashǵabad jáne Tegeranda sol elderdiń farabitanýshy ǵalymdarymen birge dóńgelek ústelder ótkiziledi. Iraktyń astanasy Baǵdat qalasyndaǵy Ál-Farabi ýniversitetinde Shyǵystyń uly oishyl ǵalymynyń eskertkishi ashylatyn bolady.
«Sodan keiin 2020 jylǵy 21 qańtarda QR Mádeniet jáne sport ministri bastaǵan delegatsiia men ekspeditsiia músheleri Damaskide Elbasymyzdyń tapsyrmasymen salynǵan Ál-Farabi ortalyǵyn saltanatty túrde ashady. Qazir bul ortalyqty retke keltirý jumystary júrgizilýde. Prezidenttiń tapsyrmasy boiynsha 4-7 qarashada QR Syrtqy ister, Mádeniet jáne sport, Bilim jáne ǵylym ministrlikteriniń jaýapty qyzmetkerleri men «Qazqaitajańartý» mekemesiniń mamandary Siriiaǵa is-saparmen shyǵady. Sapar barysynda Siriia tarapymen Damask qalasyndaǵy ál-Farabi ortalyǵyn saltanatty ashý jóninde tiisti kelissózder júrgizedi. 2020 jyldyń sáýirinde «Aristotelden keiin «Ekinshi ustaz» atalǵan Ábý Nasyr ál-Farabidiń álem órkenietine qosqan úlesi» taqyrybynda ǵylymi-praktikalyq konferentsiia Afina qalasyndaǵy «Panteon» Saiasi jáne áleýmettik ǵylymdar ýniversitetinde bolady», - dedi Muhtar Tileýberdi.
Sondai-aq ministrdiń dereginshe, Islam Yntymaqtastyq Uiymyna múshe elderdiń Syrtqy ister ministrleriniń 47-shi sessiiasy aiasynda Ál-Farabidiń 1150 jyldyǵyna arnalǵan fotokórme ashylady. Al Pákistannyń Karachi qalasynda IYU-nyń janyndaǵy KOMSTEK ǵylymi-tehnologiialyq yntymaqtastyq jónindegi turaqty komiteti aiasynda Ál-Farabi shyǵarmashylyǵyna arnalǵan ǵylymi-praktikalyq konferentsiia ótedi. Mysyrdyń «Ál-Azhar», Kair ýniversitetteri jáne Qazaq ulttyq ýniversiteti ǵalymdary «Ábý Nasyr ál-Farabi murasy entsiklopediiasyn» arab jáne qazaq tilinde jaryqqa shyǵarýdy qolǵa aldy.
«Ózderińizge málim, 2020 jylǵy qazan aiynda Dýbaida dúniejúzilik EKSPO kórmesi óz jumysyn bastaidy. Qazaqstan pavilonynda Ál-Farabi ortalyǵyn ashýdy kózdep otyrmyz. Osy oraida EKSPO kezinde ótetin Álemdik úkimet sammitinde «Qaiyrymdy qoǵam týraly Ál-Farabi kózqarastarynyń ómirsheńdigi» atty arnaiy plenarlyq sessiia ótkizý týraly usynys engizemiz. Qazaqstan «Baqyt koalitsiiasyna» múshe bolyp tabylatyndyqtan, bul sharany QR Aqparat jáne qoǵamdyq damý ministrligi qolǵa alady degen senimdemiz. 2020 jylǵy 18 qarashada, iaǵni UNESCO aiasynda atap ótiletin Álemdik filosofiia kúni qarsańynda Parijdegi UNESCO shtab-páterinde QR Bilim jáne ǵylym, Mádeniet jáne sport ministrlikterimen birlesip, Ábý Nasyr Ál-Farabidiń mereitoiyna arnalǵan halyqaralyq ǵylymi konferentsiia jáne taqyryptyq kórme ótkiziledi. Osy is-sharalarǵa bedeldi ǵalymdar, tarihshylar jáne basqa elderdiń mamandary shaqyrylatyn bolady», - dedi ol
Muhtar Tileýberdi Qazaqstannyń Elshilikteri Ulttyq aýdarma biýrosymen birlesip, Ál-Farabi eńbekterin shet tilderge aýdarýǵa atsalysýǵa daiyn ekendigin basa aitty. Qazaqstannyń Vashingtondaǵy Elshiligi de Ál-Farabi eńbekteriniń aǵylshyn tilindegi aýdarmasynyń tanystyrylymyn AQSh Kongressiniń kitaphanasynda uiymdastyryp, AQSh-tyń analitikalyq ortalyqtarynyń birine resmi tabystaýdy josparlap otyrǵandyǵyn atap ótti.
«Sonymen qatar Ánýar Álimjanovtyń «Ustazdyń oralýy» atty kórkem kitaby da birneshe tilderge aýdarylatyn bolatyn. Ystanbul men Deli qalasyndaǵy «Ál-Farabi úileriniń» qyzmetterin jandandyrýǵa da kóp kóńil bólýdemiz. 40 jýyq shet elderde Ábý Nasyr ál-Farabidiń 1150 jyldyǵyna arnalǵan fotokórmeler uiymdastyrylady. «Qazposhtanyń» atsalysýymen AQSh, Shveitsariia, Germaniia, Niderland, Túrkiia, Latviiada ál-Farabidiń 1150 jyldyǵyna arnalǵan sol elderdiń merekelik poshta markalary shyǵarylady», - dedi ministr.
