QR Syrtqy ister ministri Muhtar Tileýberdi AQSh-qa resmi saparmen barady. Bul týraly búgin QR Syrtqy ister ministrliginiń resmi ókili Aibek Smadiiarov aitty, dep habarlaidy "Ult aqparat".
«12-13 jeltoqsanda QR Syrtqy ister ministri Muhtar Tileýberdiniń Amerika tarapynyń shaqyrýymen AQSh-qa resmi sapary josparlanǵan. Sapar aiasynda osy eldiń memlekettik hatshysy Maikl Pompeo, Úkimet, AQSh kongresi jáne Dúniejúzilik banktiń resmi ókilderimen kezdesýler qarastyrylǵan. Josparlanǵan kelisssózder barysynda ekijaqty jáne óńirlik kúntártiptegi keń aýqymdy máseleler talqylanatyn bolady», - dedi Aibek Smadiiarov.
Sondai-aq, ministr Ispaniiaǵa saparmen barady dep kútilýde.
«QR Syrtqy ister ministri 15-16 jeltoqsan kúnderi Madrid qalasynda «Aziia-Eýropa» forýmyna qatysýshy elderdiń Syrtqy ister ministrleriniń «Aziia men Eýropa – tiimdi kópjaqtylyq úshin birge» taqyrybyna arnalǵan 14-shi keńesine qatysady. Is-sharaǵa Aziia men Eýropanyń, sondai-aq Eýropalyq odaq pen ASEAN-nyń 51 eliniń syrtqy saiasi vedomstvo basshylarynyń qatysýy josparlanǵan», - dedi resmi ókil.
Onyń aitýynsha, forým barysynda halyqaralyq kún tártiptegi eń ózekti máseleler, sonyń ishinde Aziia men Eýropa elderi arasyndaǵy ózara bailanysty nyǵaitý, turaqty damý, klimattyń ózgerýi, iadrolyq qarýdy taratpaý, kiberqaýipsizdik, Siriiadaǵy, Aýǵanstandaǵy jaǵdailar jáne basqa da ózekti máseleler talqylanady.
«Qazaqstan SIM basshysynyń Syrtqy ister ministrleri keńesi alańynda «Aziia-Eýropa» forýmyna qatysýshy elderdiń syrtqy saiasi vedomstvolarynyń basshylarymen birqatar ekijaqty kezdesýi josparlanǵan», - dedi Aibek Smadiiarov.
