Kvazimemlekettik sektorǵa bólinip jatqan memlekettik qarajatty qysqartý kerek. Bul týraly 2020-2022 jyldarǵa arnalǵan biýdjetti talqylaý barysynda qoǵam belsendisi Muhtar Taijan aitty, dep habarlaidy Sputnik Qazaqstan.
"Búgin men de qapa bolyp otyrmyn. Osymen biýdjetti talqylaýǵa ekinshi ret qatysyp otyrmyn. Men bir qorytyndyǵa keldim. Bizde ekonomikalyq saiasat esh ózgergen joq. Demek, osy saiasattyń nátijesi de ózgermeidi", - dedi Taijan parlamentte ótken jiynda.
Onyń aitýynsha, osy joly taǵy biýdjetten júzdegen million dollar kvazimemlekettik sektordy, iaǵni "Samuryq-Qazyna" qoryna qarasty kompaniialardyń jarǵylyq kapitalyn tolyqtyrýǵa qarastyrylyp otyr.
"Biz kvazimemlekettik sektordy jappai azaitýymyz kerek. Kvazimemlekettik sektor degenmiz ne? Ol – QazAgro, Samuryq, Báiterek, Damý, Agrarlyq kredittik korporatsiia. Osy árbir holdingtiń júzdegen shaǵyn kompaniiasy bar. Olardyń 90 protsenti – bankrot. Olar tek memlekettiń aqshasyn jep jatyr. Basqa paida joq. Aqshany jep jatqany bylai tursyn, ekonomikada jeke sektordyń damýyna jol bermei otyr", - dep atap kórsetti Taijan.
Onyń sózine qaraǵanda, ekonomikany damytý úshin aldymen kvazimemlekttik sektordaǵy paidasyz kompaniialardan qutylý qajet. Onsyz jeke sektor, iaǵni shaǵyn jáne orta biznes damymaidy. Al biznes damymasa, jumys oryndary qurylmaidy.
Qoǵam belsendisi ótken jylǵy biýdjetti de eske aldy. Bas kezinde bárin talqylap, bekitip qoiǵan. Biraq qyrkúiek aiynda taǵy da "Tsesna bankke" kómek berý týraly sheshim qabyldandy. Sóitip, biýdjettiń qyrýar qarjysy bólindi.
"Jekemenshik bankterge kómek berýdi toqtatý qajet. Soǵan bizdiń biraz aqshamyz ketip jatyr. Sodan ekonomikamyz da damymai keledi", - deidi Taijan.
