Ulttyq qoǵamdyq senim keńesiniń múshesi, ekonomist Muhtar Taijan ekonomikalyq qaýipsizdikti qamtamasyz etý úshin Qazaqstan qaryz alǵan elderdiń tizimin jasaýdy usyndy, dep habarlaidy Sputnik Qazaqstan.
"Dúnie júzinde Qazaqstannan basqa da memleketter bar ǵoi, kórshi elder bar. Meniń usynysym – Qazaqstan kórshilerden qansha qaryz aldyq, qansha óndiris ashyldy, osynyń naqty úlken reestrin jasaýymyz kerek. Bul syrtqy ekonomikalyq qaýipsizdigimiz úshin óte mańyzdy dep esepteimin",- dedi Taijan ulttyq keńestiń otyrysynda.
Ol Qazaqstan ekonomikasynyń nege damymai otyrǵanyn aitty.
"Bizdiń oiymyzsha, ol memlekettiń kinási dep aitýǵa bolady. Óitkeni memleket ekonomikany óte qatal jaǵdaida ustap tur. Qazaqstan ekonomikasynda memlekettiń úlesi, róli tym úlken. Sondyqtan muny azaitý kerek. Sonda ǵana jeke sektor damidy, jańa jumys oryndary paida bolady", - dedi ekonomist.
Taijannyń pikirinshe, elde kvazimemlekettik nemese memlekettik sektordy jappai azaitý qajet.
"Álbette, bul - óte kúrdeli úrdis. Kvazimemlekettik kompaniialar óz-ózin qysqarta almaidy dep oilaimyn. Sondyqtan bul protsesti qoǵamdyq belsendiler, Ulttyq keńes músheleri baqylaýǵa alýy tiis dep sanaimyn", - dedi ol.
Keńes múshesi ár saladaǵy monopoliialarǵa da toqtaldy.
"Ekonomikamyzda jasandy monopoliia kóp. Qai salany alsaq ta, qajet emes monopoliialar bar. Olar baǵany ustap turady, saldarynan infliatsiia joǵary bolady. Shaǵyn bizneske jáne firmalarǵa oryn bolmaidy. Jumyssyzdyq kóbeiedi", - dedi Taijan.
Ol ekonomikany damytý úshin sot júiesi myqty, táýelsiz ári kásibi bolýy kerek ekenin atap ótti.
Aita keteiik, Nur-Sultanda Prezident janyndaǵy ulttyq qoǵamdyq senim keńesiniń alǵashqy otyrysy ótti. Keńes biyl maýsymda Toqaevtyń jarlyǵymen qurylǵan bolatyn.
