Burynǵy qorǵanys ministri, Parlament Senatynyń depýtaty Muhtar Altynbaev Taldyqorǵan mańynda áýe apatyna ushyraǵan qazaqstandyq Sý-27 ushaǵynyń qulaýynyń sebepterin atady, - dep habarlaidy "Ult aqparat" kaz.tengrinews.kz portalyna silteme jasap.
Muhtar Altynbaevtyń aitýynsha, joiǵysh ushaq ondaǵy otyn júiesindegi aqaýlardyń bolýyna bailanysty apatqa ushyraǵan. "Menińshe, bul áýe apaty otyn júiesimen nemese otynǵa bailanysty bolyp otyr. Qysqy ýaqytta otyn daiyndaýdyń óz tártibi bar. Qazir komissiia osy jumystardyń qanshalyqty atqarylǵanyn tekseretin bolar. (...) Mundai jaǵdaida barlyq ushý toqtatylady. Ushaqtar men ondaǵy ushqyshtardy daiyndaityn uiymdar da tekseristerden ótkiziledi", - dedi burynǵy qorǵanys ministri.
"Eki qozǵaltqyshtyń birdei jumys istemei qalýy - sirek kezdesetin jaǵdai. Jaǵdai qiyn bolǵan. Men sol kezdegi ushqyshtyń áreketin atap ótkim keledi. Ol óte durys jasady. Ushaqty eldi mekenderden ary alyp ketti. Iaǵni, ol baisaldy túrde ushaqtyń bir qozǵaltqyshynyń isten shyqqanyn, al keiinirek ekinshi qozǵaltqyshtyń jumys istemei qalǵanyn habarlady. Ushqysh qozǵaltqysh isten shyqsa da, ol jaqtan ketip qalmady. Ol óte durys jasady", - dep atap ótti Parlament Senatynyń depýtaty.
Sonymen qatar, ol Qazaqstanda shamamen 30 Sý-27 joiǵyshynyń bar ekenin aitty. "Bir polk - 26 ushaq. Taǵy tórt ushaq satyp aldyq, sosyn taǵy eki jańa ushaq jetkizildi. Shamamen 30 ushaq bar", - dedi senator.
"Qazir joiǵyshtardyń baǵasy ár túrli. Jańa ushaqtyń baǵasy 10 million dollarǵa jetedi. Al myna ushaqtarǵa, menińshe, 30 jyl boldy. Men naqty qai ushaqtyń qulaǵanyn bilmeimin. Eger de Sý-27 ushaǵy qulasa, biz ony 1996 jyly elge ákelgenbiz. Bul ushaqtardy reseilikter ótemaqy retinde bergen bolatyn. 1996 jyly alynǵan bolsa, onda bul ushaqtarǵa 20 jyl boldy", - dedi Muhtar Altynbaev.
Eske sala keteiik, keshe, 21 jeltoqsanda Sý-27 joiǵysh ushaǵy apatqa ushyraǵan bolatyn. "Búgin, 21 jeltoqsanda tún jaǵdaiynda oqý-jattyǵý ushýyn oryndaý kezinde aviatsiialyq oqiǵanyń saldarynan Sý-27 ushaǵy apatqa ushyrady. Ushqysh maior Á.Ysqaqov bar múmkindigin saldy jáne ushaqty eldi mekennen alshaq alyp ketip, katapýltalandy", - delingen edi ministrliktiń resmi pikirinde.
