Foto: QR Úkimetiniń baspasóz qyzmeti
Búgin Astanada burynǵy mádeniet ministri, Ulttyq mýzei direktory Arystanbek Muhamediulyna qatysty is boiynsha basty sot talqylaýy bastaldy. Is sýdia Baǵlan Ydyrysovtyń tóraǵalyǵymen Baiqońyr aýdanynyń №2 sotynda qaralyp jatyr, dep habarlaidy Sputnik Qazaqstan.
Eks-ministrden bólek, sot aldyna "Eksponat" JShS direktorynyń orynbasary Azamat Kóshenov jáne kompaniianyń býhgalteri Aiym Sádýaqasova, sondai-aq Ulttyq mýzei direktorynyń burynǵy orynbasary Almaz Nurazhan keldi. Sádýaqasovadan basqa barlyq sottalýshy Astananyń tergeý izoliatorynda qamaýda otyr.
Sotta advokat Tóleev aldyn ala tyńdaý ótkizip, óziniń qorǵalýshysy Muhamediulyna qatysty isti qylmys quramynyń bolmaýyna bailanysty toqtatýdy ótindi. Sondai-aq ol eks-ministrdiń zeinet jasy men densaýlyǵyn eskerip, bultartpaý sharasyn úiqamaqqa aýystyrýdy surady. Muhamediulynyń ózi advokatynyń ótinishin qoldady.
"Birneshe kún buryn maǵan ekinshi ota jasaldy. Osyǵan bailanysty meni úiqamaqqa jiberýdi suraimyz. Densaýlyǵym kúnnen kúnge nasharlap barady, úiqamaqqa aýystyrý aqylǵa qonymdy bolar edi", - dep málimdedi Arystanbek Muhamediuly sotta.
Sondai-aq advokat Temirbolatov kámeletke tolmaǵan tórt balasynyń bolýyna bailanysty sottalýshy Azamat Kóshenovti de úiqamaqqa jiberýdi surady. Buǵan qosa qorǵaýshy tarap qujattary sotqa deiingi tergeý bastaýǵa negiz bolǵan Antikordyń qyzmetkerlerin jaýap alýǵa shaqyrýdy ótindi. Al sottalýshynyń ózi akter Tuńǵyshbai Jamanqulovty kýáger retinde sotqa shaqyrýdy surady. Kóshenovtiń aitýynsha, akter onyń Muhamediulymen bailanysy týraly málimetterdi jariialaǵan.
Sýdia sheshim qabyldaý úshin keńes bólmesine ketti. Otyrys 15.00-de qaita jalǵasady.
Eske salsaq, Ulttyq mýzei direktory Arystanbek Muhamediuly 2022 jyly 28 mamyrda tutqyndaldy. Ol "Altyn adamnyń álem murajailary boiynsha sherýi" halyqaralyq kórmesine bólingen milliondaǵan aqshany jymqyrdy degen kúdikke ilindi.
