Mádeniet jáne sport ministri Arystanbek Muhamediuly QR Parlamenti Májilisinde «Tarihi-mádeni mura obektilerin qorǵaý jáne paidalaný týraly» jáne «QR keibir zańnamalyq aktilerine tarihi-mádeni mura máseleleri boiynsha ózgerister men tolyqtyrýlar engizý týraly» QR zań jobalaryn tanystyrdy, dep habarlaidy Baq.kz tilshisi.
Onyń aitýynsha, tarihi-mádeni mura obektilerinde júrgiziletin arheologiialyq, restavratsiialyq jumystardy retteý máselesi qaita qaraýdy talap etedi.
«Bizdiń biregei eskertkishterimiz nemese áli zerttelmegen obektiler kóbinese «qara arheologtar» tarapynan izdestirý men qazba jumystaryna ushyrap jatqany qupiia emes, olardan keiin eskertkishter ashyq kúide qalyp nemese tolyqtai joiylady. Sondai-aq, tarihi-mádeni mura obektilerine irgeles aýmaqtarda júrgiziletin qarqyndy qurylys jumystarynyń tarih jáne mádeniet eskertkishteriniń tarihi tutastyǵyna jáne saqtalýyna eleýli áserleri tiip, teris saldarǵa ákelip soǵyp jatqan jaǵdailar da kezedesedi», - dep atap ótti Muhamediuly.
Ministrdiń sózinshe, quqyqtyq salada naqty retteýdi talap etetin jáne tarihi-mádeni mura obektilerin qorǵaý jáne paidalaný úshin qolaily jaǵdailar jasaýdy qajet etetin mindetterdi kúsheitý kerek.
Osy oraida, zańnamalyq deńgeide:
- tarihi-mádeni mura obektilerin anyqtaý jáne esepke alý, sondai-aq olardyń jaǵdaiyn monitoringteý tártibin bekitý;
- tarihi-mádeni mura obektileriniń túpkilikti tarihi kelbetin saqtaý men paidalanýdyń sapaly jańa mehanizmderin engizý;
- arheologiialyq jumystardy júrgizý jáne «qara arheologiiaǵa» qarsy kúres erejeleri men sharttaryn bekitý;
- qorǵaý aimaqtarynda jer ýchaskelerin paidalanýdyń quqyqtyq rejimin, tarih jáne mádeniet eskertkishteriniń qurylysty salýdy retteý, tabiǵi landshaft aimaqtaryn paidalanýdyń quqyqtyq rejimin anyqtaý usynylady.
Zań jobasyn ázirleý protsesinde halyqaralyq tájiribe zerdelenip, eskerilgen.
«Resei zańnamasynda zańsyz arheologiialyq izdenisterdi júrgizý, arheologiialyq zattardy jymqyrý, artefaktilerdi memleketke ótkizýden jaltarý jáne t.b. úshin «qara arheologiiaǵa» qarsy turý sharalary engizilgen, qylmystyq jaýapkershilik qarastyrylǵan», - dedi Mádeniet jáne sport ministri.
