Foto: QR Jazýshylar Odaǵy
Qazaqtyń uly aqyny Muqaǵali Maqataevtyń esimimen atalǵan respýblikalyq ádebi-mádeni jáne tanymdyq «Muqaǵali» jýrnalynyń jaryq kóre bastaǵanyna biyl 20 jyl toldy. Osy aitýly dataǵa orai QR Ulttyq kitaphanasynda «Muqaǵalitanýdyń qainar kózi» atty qalamgerler men oqyrman qaýymǵa arnalǵan mereitoilyq kesh ótti, dep habarlaidy Ult.kz.
Sharaǵa eldiń rýhani ortasynda júrgen birqatar tulǵalar qatysty. Olardyń qatarynda QR Prezidentiniń keńesshisi Málik Otarbaev, aqyn-dramatýrg, memleket jáne qoǵam qairatkeri Nurlan Orazalin, Almaty oblysy ákiminiń orynbasary Ǵani Mailybaev, Almaty qalasy Mádeniet basqarmasynyń basshysy Daniiar Áliev, jýrnaldyń alǵashqy bas redaktory, jazýshy Batyq Májituly, Qazaqstannyń halyq jazýshysy Smaǵul Elýbaev, qoǵam qairatkeri Rysbek Sársenbai, aqyn ári kompozitor Saǵatbek Medeýbekuly jáne ózge de tanymal qalamgerler boldy.
Kesh barysynda Qazaqstan Jazýshylar odaǵynyń Basqarma Tóraǵasy Mereke Qulkenov mereitoi ielerine quttyqtaý sóz arnap, jýrnaldyń ádebi keńistiktegi róline joǵary baǵa berdi. Ol óz sózinde: «Jiyrma jyl – ádebi basylym úshin az ýaqyt emes. Osy kezeń ishinde jýrnal Muqaǵali Maqataevtyń poetikalyq murasyn keńinen nasihattap qana qoimai, qazaq poeziiasynyń órisin keńeitýge, jas daryndardy tanytýǵa, rýhani qundylyqtardy dáripteýge eleýli úles qosty» – dei otyryp, shyǵarmashylyq ujymǵa Qazaqstan Jazýshylar odaǵy atynan arnaiy syi-siiapat tabystady.
Muqaǵalimen birge Qazaq radiosynda diktorlyq qyzmet atqarǵan Baqytjan Atakeldievtiń oqyǵan jyrlary keshtiń kórkem bolmysyn tereńdete tústi. Sondai-aq aqynnyń uly Juldyz Maqataev pen kelini Baqytkúl Aidarova jýrnal ujymyna júrekjardy yqylastaryn bildirip, aq tilekterin jetkizdi.
Mereitoi qurmetine belgili ánshi, «Qurmet» ordeniniń iegeri Sulýshash Nurmaǵambetova aqyn «Sarjailaý» ánin oryndap, keshtiń sánin kirgizdi.
Shara sońynda «Muqaǵali» jýrnalynyń qazirgi bas redaktory, Qazaqstannyń eńbek sińirgen qairatkeri, «Qurmet» ordeniniń iegeri Dúisen Maǵlumov basylymnyń búgingi baǵyt-baǵdary men bolashaqtaǵy josparlaryna toqtalyp, oqyrmanǵa qyzmet etýdi jalǵastyra beretinin aitty.
Ulttyq kitaphanada ótken bul mereitoi ziialy qaýym, aqyn-jazýshylar, mádeniet jáne BAQ ókilderiniń basyn qosyp, «Muqaǵali» jýrnalynyń el rýhaniiatyndaǵy orny men missiiasyn taǵy bir márte aiǵaqtaǵan erekshe kesh retinde este qaldy.
