Múgedektigi bar adamdarǵa arnalǵan qaiyrymdylyq aktsiiasyn ótkizý týraly aqparat jalǵan ekeni anyqtaldy. Bul týraly Eńbek jáne halyqty áleýmettik qorǵaý ministrliginen málim boldy, dep habarlaidy "Ult aqparat".
«Messendjerler men áleýmettik jelilerde taratylyp jatqan 23 shilde kúni QR Eńbek jáne halyqty áleýmettik qorǵaý ministrliginiń janynda múgedektigi bar adamdarǵa arnalǵan qaiyrymdylyq aktsiiasy ótetini týraly aqparat shyndyqqa janaspaidy. Ministrlik múgedektigi bar adamdar men múgedektigi bar balalardy tárbielep otyrǵan otbasylar úshin qandai da bir aktsiialar ótkizý josparlanbaǵanyn habarlaidy. Azamattardan jalǵan aqparatqa nazar aýdarmaýdy jáne aqparatty tek resmi derekkózderden alýdy suraimyz. Jalǵan aqparat taratý zań boiynsha jazalanady», - delingen vedomstvo málimetinde.
Ministrlik málimetinshe, Qazaqstanda múgedektigi bar adamdardyń ómir súrý sapasyn jaqsartý boiynsha turaqty negizde josparly jumys júrgizilýde. 2020 jyly áleýmettik tólemderge, ońaltýdyń tehnikalyq quraldarymen jáne qyzmetterimen qamtamasyz etýge memlekettik biýdjetten 455 mlrd teńge bólindi, aǵymdaǵy jyly bul maqsattarǵa 486 mlrd teńge kózdelgen.
Alýshylarǵa yńǵaily bolýy, ońaltý quraldarymen jáne qyzmetterimen qamtamasyz etýdi jaqsartý úshin Áleýmettik qyzmetter portaly iske qosyldy (aleumet.egov.kz). Qańtar aiynan bastap portalǵa ońaltýdyń tehnikalyq quraldarynyń barlyq 55 túri kóshirildi.
Múgedektigi bar balalardy ońaltý qyzmetterimen qamtamasyz etý úshin jergilikti atqarýshy organdarmen birlesip shaǵyn sipattaǵy ońaltý ortalyqtaryn ashý boiynsha jumys júrgizilýde. Biyl 12 ortalyq ashylady, onyń 6-aýy jumys istep tur (Pavlodar oblysy, qamtý aýqymy – 150 bala; Qyzylorda oblysy – 150; BQO – 100; Aqtóbe oblysy – 350; Aqmola oblysy – 100; Nur-Sultan qalasy – 150).
«Múmkindikteri shekteýli adamdar úshin meditsinalyq-áleýmettik saraptamanyń rásimderi men merzimderin ońtailandyrý maqsatynda Eńbekmini múgedektikti syrttai belgileýdi engizý boiynsha jumys júrgizýde. 1 shildeden bastap joba 6 óńirde: Nur-Sultan, Almaty qalalarynda, Batys Qazaqstan, Soltústik Qazaqstan, Aqmola jáne Qaraǵandy oblystarynda iske qosylady. Jobany iske asyrý keleshekte múgedektigi bar adamdardyń instantsiialar boiynsha júrýin jáne kórsetiletin qyzmetti berýshimen tikelei bailanysyn boldyrmaýǵa múmkindik beredi», - delingen habarlamada.
Áleýmettik qyzmet kórsetý sapasyn arttyrý maqsatynda qazirgi ýaqytta Áleýmettik qyzmetti odan ári jańǵyrtý jónindegi ulttyq jospar ázirlendi jáne jaqyn arada qabyldanatyn bolady.
