QR Eńbek jáne halyqty áleýmettik qorǵaý ministri Serik Shápkenov onlain rejimde múgedektigi bar adamdardy áleýmettik qorǵaý salasyndaǵy úilestirý keńesiniń múshelerimen beiresmi kezdesý ótkizdi, dep habarlaidy atalǵan vedomstvonyń baspasóz qyzmeti.
Is-sharaǵa 30-dan astam adam qatysty, olardyń ishinde múgedekterdiń qoǵamdyq birlestikteriniń basshylary jáne óńir ákimderiniń múgedektigi bar adamdar máseleleri jónindegi shtattan tys keńesshileri bar.
«Bul qandai da bir naqty kún tártibi bar Úilestirý keńesiniń otyrysy emes, bul kezdesýde men sizderdiń suraqtaryńyz ben usynystaryńyzdy tyńdap, bar problemalardy talqylap, olardy sheshý joldaryn izdestirgim keldi», – dedi Serik Shápkenov.
Birneshe saǵat ishinde is-sharaǵa qatysýshylar áleýmettik qyzmetter portalynyń jumysy, jumysqa ornalasý, arnaiy áleýmettik qyzmetter kórsetý, múgedektigi bar balalardy ońaltý, sanatorlyq-kýrorttyq emdeý, invataksi jáne jeke kómekshiler qyzmetterin usyný, áleýmettik jáne kólik infraqurylymynyń qoljetimdiligin qamtamasyz etý, oqytý jáne sportpen ainalysý úshin jaǵdai jasaý jáne t.b. máselelerdi kóterdi.
Ministr múgedekterdiń qoǵamdyq birlestikteriniń basshylaryn qyzyqtyrǵan suraqtarǵa jaýap berdi, sondai-aq bar problemalardyń sheshimin baqylaýǵa alýǵa ýáde berdi.
QR Eńbekmininiń quzyretine jatpaityn máselelerdi ministr basqa vedomstvolardaǵy áriptesterimen talqylaýǵa ýáde berdi.
Esterińizge sala keteiik, aǵymdaǵy jylǵy 1 aqpanda Serik Shápkenov Májilistiń Áleýmettik-mádeni damý komitetiniń otyrysynda «Nur Otan» partiiasynyń sailaýaldy tuǵyrnamasyn iske asyrý aiasynda ázirlengen «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» Zań jobasyn tanystyrdy.
Zań jobasy Múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deiingi ulttyq jospardy oryndaý sheńberinde ázirlendi. Qujat Parlament Májilisi men Senatynyń jumys toptary músheleriniń, Úkimet janyndaǵy múgedektigi bar adamdar máseleleri jónindegi úilestirý keńesiniń, sondai-aq jurtshylyq pen sarapshylar qaýymdastyǵynyń usynystaryna negizdeldi.
